Azərbaycanın nadir dağ ekosistemi vardır
Bakı, 24 oktyabr (AZƏRTAC). Oktyabrın 24-də Bakıda öz işinə başlamış “Dünyanın dağlıq regionlarında turizmin davamlı inkişafı üçün dağ idman növlərinin Qafqaz nümunəsində mühüm rolu” mövzusunda Beynəlxalq konfrans Dağçılıq və Dırmanma üzrə Beynəlxalq Federasiyanın (UIAA) təşəbbüsüdür. Dağçılıq dünyanın hər yerində artıq kütləviləşdiyinə görə, insanların digər fəaliyyət sahələri kimi, bu da öz növbəsində dağların ekosisteminə təsir göstərməyə başlayır. Bununla əlaqədar UIAA dağların mühafizəsi ilə bağlı prosesə başlamışdır, həmçinin dağçılıq işinin təşkili ilə məşğul olan milli federasiyalar, ekoturizm təşkilatları üçün beynəlxalq mükafat təsis etmişdir.
AZƏRTAC xəbər verir ki, bu sözləri beynəlxalq konfransda iştirak edən ekologiya və təbii sərvətlər naziri Hüseynqulu Bağırov jurnalistlərə müsahibəsində demişdir.
Nazir bildirmişdir ki, Azərbaycanın nadir dağ ekosistemi vardır və onu mütləq qorumaq lazımdır. Belə konfransların keçirilməsi mühümdür, çünki burada dağlardan düzgün istifadə qaydaları və prinsiplər formalaşdırılmalıdır ki, hər kəs onları bir norma kimi qəbul etsin.
Bölmənin digər xəbərləri
