Azərbaycanın Özbəkistandakı səfirliyinin əməkdaşı Daşkənddə turizmlə bağlı beynəlxalq konfransda məruzə ilə çıxış etmişdir
Daşkənd, 2 aprel (AZƏRTAC). Daşkənd Dövlət İqtisad Universitetinin və “Özbəkturizm” Agentliyinin birgə təşkilatçılığı ilə “Turizm sahəsində kadrların hazırlanması və məşğulluğun təmin edilməsi” mövzusunda Beynəlxalq konfrans keçirilmişdir.
Ölkəmizin Özbəkistandakı səfirliyinin ikinci katibi Səbuhi Əhmədov konfransda Azərbaycanın turizm potensialı haqqında geniş məruzə etmişdir. O, müstəqillik illərində Azərbaycanın turizm sektorunun inkişafı məsələlərinə toxunaraq demişdir ki, Prezident İlham Əliyevin rəhbərliyi ilə ölkəmizdə turizmin inkişafı, onun infrastrukturunun yaradılması işinə böyük diqqət yetirilir. O, Azərbaycanda Turizm İnstitutunun yaradılması, bu ali təhsil müəssisəsinin strukturu, fəaliyyət istiqamətləri, turizm sahəsi üçün peşəkar kadrların hazırlanması istiqamətində görülən işlər haqqında məlumat vermişdir.
S.Əhmədov “2010-2014-cü illərdə Azərbaycan Respublikasında turizmin inkişafına dair Dövlət Proqramı”nın qəbul olunması, bu sənədin həyata keçirilməsi istiqamətində görülmüş işlər, Azərbaycanın turizm ölkəsi imicinin qaldırılması, 2011-ci il ölkəmizdə “Turizm ili” elan edilməsi və digər məsələlər haqqında da danışmışdır. Bildirmişdir ki, Azərbaycanın “Eurovision-2011” mahnı müsabiqəsində qələbə qazanması qısa müddətdə ölkəmizdə turizm infrastrukturunun genişləndirilməsinə imkan yaratmışdır.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
