AZƏRBAYCANIN RABİTƏ SAHƏSİNDƏ TRANZİT İMKANLARI SƏFƏRBƏRLİYƏ ALINIR
Rabitə və informasiya texnologiyaları naziri Əli Abbasov AZƏRTAC-ın müxbirinə demişdir ki, Azərbaycanda rabitə sahəsində tranzit imkanlarından tam istifadə olunmur. Tranzit qiymətləri baha olduğu üçün hazırda Şimal, Cənub və Qərbə istiqamətlənmiş fibrooptika magistralının tam gücünün ancaq 5 faizindən istifadə olunur. Azərbaycan tərəfi rabitə sahəsində ölkənin tranzit imkanlarından istifadə etmək üçün dəfələrlə cəhd göstərmiş, Şanxaydan (Çin) Frankfurta (Almaniya) gedən xətti Xəzər dənizinin dibi ilə aparmaq barədə müqavilə bağlamaq üçün Türkmənistana müraciət etmişdik. Lakin həmin müqavilə baş tutmadı. İndi Qazaxıstanla danışıqlar aparırıq. Yəqin ki, həmin layihəni Siyəzən-Aktau arasında reallaşdıracağıq. Siyəzən-Aktau xətti Avropadan Asiyaya gedən informasiyanın əksər hissəsinin Azərbaycandan keçməsinə imkan verəcək və nəticədə ölkəmizin tranzit gücü, təxminən 30 faiz artacaqdır.
Nazirin sözlərinə görə, informasiyanın bir dəqiqəsinin tranzit qiyməti 10 sentdir. Bu hesabla ölkəmizin büdcəsinə ilk dövrlərdə 10-15 milyon ABŞ dolları daxil ola bilər. Avropa ilə Asiya arasında informasiya mübadiləsi get-gedə intensivləşir və deməli, gələcəkdə həmin rəqəm daha da artacaqdır.
Bölmənin digər xəbərləri
