AZƏRBAYCANIN RUS İCMASININ NÜMAYƏNDƏLƏRİİLƏ GÖRÜŞ
Nümayəndə heyətinin başçısı, Federasiya Şurası sədrinin müavini Svetlana Orlova bildirmişdir ki, onlar Rusiya parlamentinin yuxarı palatasını təmsil edirlər. Nümayəndə heyətinə qanunverici hakimiyyətin və icra hakimiyyətinin hərəsindən bir nümayəndə daxildir. O, nümayəndə heyətinin üzvlərini – Federasiya Şurasında yeganə azərbaycanlı olan və Krasnodar diyarını təmsil edən Fərhad Əhmədovu, Dövlət dumasının Azərbaycan üzrə komissiyasının üzvlərini, Belarus, Tacikistan, Qazaxıstan nümayəndələrini təqdim etmişdir.
S.Orlova xatırlatmışdır ki, bu il Rusiyada Azərbaycan ilidir. Rusiya Prezidenti Vladimir Putinin gələn ilin fevralında Azərbaycana səfəri nəzərdə tutulur. Biz Azərbaycanla həm mədəni, həm də iqtisadi münasibətləri yaxşılaşdırmaq istəyirik. Bizi həm də Rusiyanın 70 regionunda yaşayan yüz minlərlə azərbaycanlı bağlayır.
Azərbaycanın rus icması sədrinin müavini Viktor Tatarenko bildirmişdir ki, hazırda Azərbaycanda 170 min rus yaşayır. Azərbaycan xalqı etnik və dini dözümlülüyü ilə həmişə fərqlənmişdir. Burada rus dili ali və orta məktəblərdə tədris edilir, teatrlar, mədəniyyət mərkəzləri fəaliyyət göstərir, rus dilində çıxan qəzet və jurnalların sayı artır, Rusiya televiziyasının iki kanalının verilişləri yayımlanır.
Qonaqlar rus icması və milli azlıqların nümayəndələrinin Milli Məclisə seçkilərə hazırlıqda iştirakı, onların sayı ilə maraqlanmış, rus icmasına köməyə görə Prezident İlham Əliyevə təşəkkür bildirmişlər. Xatırladılmışdır ki, bu yaxınlarda Prezident Vladimir Putin RF XİN-də xaricdəki həmvətənlərlə iş üzrə departament yaradılması haqqında Fərman imzalamışdır. Bu isə bir çox problemləri mərkəzləşdirilmiş şəkildə həll etməyə imkan verəcəkdir.
Bölmənin digər xəbərləri
