Azərbaycanın sülhyönümlü siyasəti beynəlxalq müstəvidə yüksək qiymətləndirilir - RƏY
Bakı, 5 fevral, AZƏRTAC
Azərbaycan Prezidenti İlham Əliyevin “Zayed İnsan Qardaşlığı Mükafatı”na layiq görülməsi Azərbaycanın son illərdə yalnız siyasi və iqtisadi deyil, eyni zamanda, mənəvi və humanitar müstəvidə də qəbul olunan bir aktora çevrildiyini nümayiş etdirir. Təbii ki, burada Prezident İlham Əliyevin apardığı siyasətin məzmunu, beynəlxalq səviyyədə formalaşmış şəxsi nüfuzu və mürəkkəb proseslərdə sülhə əsaslanan yanaşmasını xüsusilə qeyd etmək lazımdır. Dövlətimizin başçısının bu mükafat kontekstində dəyərləndirilməsi onun rəhbərliyi ilə formalaşan siyasi xəttin beynəlxalq miqyasda məhz bu dəyərlərlə uzlaşdığını göstərir. Azərbaycan mürəkkəb regional şəraitdə belə, qarşıdurmanı dərinləşdirməyən, əksinə məsuliyyətli davranış modeli ortaya qoyan ölkə kimi tanınır. Bu baxımdan Prezident İlham Əliyevin Davosda keçirilən Dünya İqtisadi Forumu çərçivəsində “Sülh Şurasının Nizamnaməsi”nin imzalanma mərasimində iştirakı və Azərbaycanın Sülh Şurasına qoşulması ölkəmizin irəli sürdüyü sülh gündəliyinin qlobal səviyyədə qəbul olunduğunu mühüm fakt kimi təsdiqləyir.
Bu sözləri AZƏRTAC-a açıqlamasında Beynəlxalq Avrasiya Mətbuat Fondunun prezidenti Umud Mirzəyev söyləyib.
O bildirib ki, ötən il BƏƏ Prezidenti Şeyx Məhəmməd bin Zayed Al Nahyanın Qarabağa rəsmi səfəri və keçirdiyi yüksəksəviyyəli görüşlər ikitərəfli münasibətlərin adi diplomatik çərçivədən çıxaraq daha dərin siyasi məzmun qazandığını göstərdi. Onun Qarabağa səfəri Azərbaycanın postmünaqişə dövründə yaratdığı yeni regional reallıqların beynəlxalq səviyyədə, xüsusilə Ərəb dünyasında qəbul olunduğunu təsdiqləyən mühüm siyasi hadisə idi. Bu kontekstdə Prezident İlham Əliyevin Birləşmiş Ərəb Əmirliklərinə səfəri əvvəlki siyasi dialoqun və formalaşmış etimad mühitinin məntiqi davamı kimi çıxış edir.
“Prezident İlham Əliyevin mükafatlandırma mərasimindəki çıxışı bu təltifin mahiyyətini daha aydın ortaya qoydu. Xüsusilə Azərbaycan ilə Ermənistan arasında münasibətlərin normallaşması istiqamətində atılan addımlar, məhdudiyyətlərin aradan qaldırılması, iqtisadi və humanitar əməkdaşlığa başlanması Prezidentin çıxışında sülhün artıq praktik mərhələyə keçdiyini göstərən faktlar kimi səsləndirildi. Eyni zamanda, mərasimin Əbu-Dabidə keçirilməsinin rəmzi mənası da çıxışda xüsusi vurğulandı. Məhz burada aparılan danışıqların sonradan Vaşinqtonda tarixi razılaşmalarla nəticələnməsi BƏƏ-nin və onun Prezidenti Şeyx Məhəmməd bin Zayed Al Nahyanın sülh prosesinə verdiyi töhfə kimi qəbul olunur. Beləliklə, bu mükafat və mükafatlandırma mərasimi Azərbaycanın son illərdə apardığı sülhyönümlü siyasətin beynəlxalq kontekstdə necə qəbul olunduğunu bir daha aydın şəkildə ortaya qoydu”, - deyə U.Mirzəyev əlavə edib.
Bölmənin digər xəbərləri
