Azərbaycanın və Gürcüstanın birgə layihələri bölgədə sülhə və sabitliyə xidmət edir
Bakı, 9 oktyabr, AZƏRTAC
Azərbaycanın qonşu ölkələrlə siyasətində strateji tərəfdaşı olan Gürcüstanla münasibətlər xüsusi əhəmiyyətə malikdir. Çünki ölkəmizin enerji resurslarının Avropa bazarlarına çatdırılmasında, həmçinin Şərq-Qərb dəhlizi üzrə yüklərin daşınmasında tarixi köklərlə bağlı olduğumuz Gürcüstan mühüm tranzit rol oynayır. Beləliklə, Cənubi Qafqazın iki ölkəsi - Azərbaycan və Gürcüstanı həm mehriban qonşuluq və tarixi dostluq münasibətləri, eyni zamanda, strateji tərəfdaşlıq əlaqələri birləşdirir. Prezident İlham Əliyevin qonşu ölkəyə növbəti - sayca 11-ci səfəri də əlaqələrimizin yüksək səviyyədə olmasının göstəricisidir.
Bu fikirləri Milli Məclisin İqtisadi siyasət, sənaye və sahibkarlıq komitəsinin üzvü Elnur Allahverdiyev AZƏRTAC-a açıqlamasında deyib.
Prezident İlham Əliyevin səfər zamanı ölkələrimiz arasında dövlətlərarası əlaqələrin möhkəm təməllər üzərində qurulması barədə fikrini xüsusi qeyd edən deputat bildirib: “Dövlətimizin başçısı Gürcüstanın Baş naziri İrakli Qaribaşvili ilə birgə mətbuata bəyanatında Cənubi Qafqazda sülhün bərqərar olmasının vaxtının çatdığını vurğuladı. İndiyədək ölkələrimiz arasında 125-dən çox sənəd imzalanıb. Azərbaycan-Gürcüstan münasibətləri tarixin bütün dönəmlərində yaxşı olub və bu əlaqələr inkişaf edərək müttəfiqlik səviyyəsinə yüksəlib. Sülhün, sabitliyin və inkişafın tərəfdarı olan Cənubi Qafqazın hər iki ölkəsinin İpək Yolu üzərində yerləşməsi birgə irimiqyaslı enerji və nəqliyyat layihələrinin icra edilməsinə imkan yaradıb. Dövlət başçısının rəsmi Bakı ilə İrəvan arasında sülh sazişi imzalandıqdan sonra region ölkələrinin üçtərəfli formatda əməkdaşlığa başlaya biləcəklərini xüsusi vurğulaması çox vacib mesajdır”.
Azərbaycan ilə Gürcüstan arasında iqtisadi münasibətlərin də yüksək səviyyə olduğunu qeyd edən E.Allahverdiyev 2004-cü ildən fəaliyyət göstərən birgə Hökumətlərarası Komissiyanın səmərəli fəaliyyətini xüsusi vurğulayıb: “Azərbaycan və Gürcüstan arasında ticarət dövriyyəsinin artması təsadüfi deyil. Ötən il iki ölkə arasında ticarət dövriyyəsi 771 milyon ABŞ dolları təşkil edib, ikitərəfli ticarətin müsbət saldosu 500 milyon ABŞ dolları olub. Bu il yanvar-avqust aylarında ikitərəfli ticarət dövriyyəsi 612,87 milyon ABŞ dollarını ötüb, müsbət saldo 444 milyon ABŞ dolları təşkil edib. Ümumilikdə Gürcüstandan Azərbaycana 279 milyon, Azərbaycandan Gürcüstana isə 3,4 milyard ABŞ dolları məbləğində investisiya qoyulub. Ölkələrimiz arasında uğurlu regional əməkdaşlıq münasibətləri çərçivəsində həyata keçirilən Bakı-Tbilisi-Ceyhan neft, Bakı-Tbilisi-Ərzurum qaz boru kəmərləri, Bakı-Tbilisi-Qars dəmir yolu və digər layihələrin reallaşdırılması bölgədə sülhün və sabitliyin möhkəmlənməsinə xidmət edir. İki ölkə arasında reallaşdırılan layihələrdən olan “Yaşıl enerji dəhlizi”nin əhəmiyyəti çox böyükdür”.
Azərbaycanla Gürcüstan arasında parlamentlər səviyyəsində əlaqələrin yüksək səviyyədə olduğunu bildirən E.Allahverdiyev beynəlxalq təşkilatlar çərçivəsində də qarşılıqlı dəstəyin göstərildiyini qeyd edib: “Ölkələrimiz hər zaman bir-birinin ərazi bütövlüyünü və suverenliyini dəstəkləyib. Biz bu dəstəyi beynəlxalq təşkilatlar çərçivəsində də nümayiş etdiririk. Ölkələrimiz arasında əməkdaşlıq əlaqələri yüksələn xətlə inkişaf edir. Prezident İlham Əliyevin Gürcüstana işgüzar səfəri bu əlaqələrin inkişaf dinamikasının daha da artmasına və qarşılıqlı maraq doğuran sahələrdə əməkdaşlığın gücləndirilməsinə töhfə verəcək”.
Bölmənin digər xəbərləri
