Azərbaycanla Argentina sahibkarları ikitərəfli ticarət imkanlarını müzakirə ediblər
Bakı, 19 mart, AZƏRTAC
Argentinanın Xarici İşlər Nazirliyi, Azərbaycanda İxracın və İnvestisiyaların Təşviqi Fondu (AZPROMO) və hər iki ölkənin digər qurumları kənd təsərrüfatı, süd və ət sənayesi üçün maşınqayırma sahəsində ilk Argentina və Azərbaycan sahibkarları arasında B2B virtual görüşünü təcrübədən keçiriblər.
Argentinanın ölkəmizdəki səfirliyindən AZƏRTAC-a bildirilib ki, AZPROMO-nun prezidenti vəzifəsini icra edən Yusif Abdullayevin və Argentinanın Ticarət və İnvestisiyaların Təşviqi üzrə katib müavini Pablo Sivorinin rəhbərliyi ilə keçən rəsmi açılışdan sonra Argentina və Azərbaycanın 22 şirkəti keçirdikləri 30-dan çox qapalı ikitərəfli görüşlərdə konkret ticarət imkanlarını müzakirə ediblər.
Katib müavini P.Sivori qeyd edib ki, bu görüş Argentina və Azərbaycanın dövlət və özəl sektorunun birgə səyinin məhsuludur və hər iki tərəfin kənd təsərrüfatının inkişafı sahəsindəki əlaqələrini genişləndirməyə verdiyi əhəmiyyəti nümayiş etdirir.
Özəl şirkətlər arasındakı əlaqə və mübadilə bu sənaye sahələrində hər iki ölkədə oxşar çətinliklərlə üzləşildiyini və bir çox texnoloji həll yollarının Argentina və Azərbaycanın kənd yerlərində bir-birinin əvəzinə tətbiq oluna biləcəyini göstərib.
İştirakçılar ikitərəfli əlaqələrin yalnız hər iki iqtisadiyyatda mövcud olan konkret imkanlarından istifadə etmək üçün deyil, eyni zamanda, regionun üçüncü ölkələrinə, xüsusən də İpək Yolu marşrutuna daxil olan ölkələrə açılaraq birlikdə işləmək məqsədilə gücləndirilməsinin vacibliyini təsdiq ediblər. Bu mənada, argentinalı iş adamları Mərkəzi Asiya ölkələrinə müxtəlif mallar ixrac etmələri üçün Azərbaycanın imtiyazlı bir giriş qapısı halına gəldiyini vurğulayıblar.
Texnikanın keyfiyyəti, uyğunlaşma qabiliyyəti və sübut edilmiş səmərəliliyi və son onilliklərdə Argentina sənayesi tərəfindən inkişaf etdirilən “know how” bu Cənubi Amerika ölkəsində kənd təsərrüfatı istehsalının sürətlə artımını yaxşı nisbətdə izah edir.
Azərbaycanlı sahibkarlar həmkarlarının təqdim etdikləri müxtəlif məhsulları maraqla izləyiblər və təqdim olunan texnikanın bir hissəsinin Azərbaycanın kənd təsərrüfatı, ət və süd istehsalının hazırkı genişləndirmə prosesinə daxil edilməsinin mümkünlüyünü müzakirə ediblər.
Argentinanın Azərbaycandakı səfiri Serxio Perez Qunella hər iki ölkənin sahibkarları arasında daha çox yaxınlaşmanın yaranması üçün başçılıq etdiyi nümayəndəlik tərəfindən belə təşəbbüslərə təkan verməyə davam edəcəyini bildirib.
Bölmənin digər xəbərləri
