Azərbaycanlı alim beynəlxalq elmi tədbirlərdə ölkəmizi təmsil edib
Bakı, 22 dekabr, AZƏRTAC
Azərbaycan Universitetinin professoru Asif Hacıyev Rusiya Federasiyasında keçirilən iki beynəlxalq elmi konfransda təşkilatçıların şəxsi dəvəti ilə iştirak edərək ölkəmizi uğurla təmsil edib. Rusiya fundamental tədqiqatlar fondunun dəstəyi ilə Volqoqrad Dövlət Sosial-Pedaqoji Universitetində keçirilmiş “Rus dili müasir onlayn təhsildə” adlı konfransda professor Hacıyev Azərbaycan Respublikasında rus dilinə münasibət, bütövlükdə rusdilli təhsilin vəziyyəti və miqyası, rus dili və ədəbiyyatının onlayn təhsil şəraitində tədrisinin elmi-metodik və filoloji məsələləri haqqında geniş məruzə ilə çıxış edib.
Universitetin ictimaiyyətlə əlaqələr şöbəsindən AZƏRTAC-a bildirilib ki, dünyanın 11 ölkəsindən və Rusiyanın 18 şəhərindən 79 iştirakçının qatıldığı konfransda rus dilinin Azərbaycan cəmiyyətində geniş işləndiyi, respublikamızda sayı yüzlərlə ölçülən rusdilli təhsil müəssisələrinin dövlət büdcəsindən maliyyələşdirildiyi və təchiz edildiyi, yerli mütəxəssislərin hazırladığı tədris resursları ilə təmin olunduğu göstərilib. Eyni zamanda, məlum pandemiyanın reallıqları ilə əlaqədar onlayn təhsilin ölkəmizin orta və ali məktəblərində, o cümlədən rusdilli təhsil ocaqlarında və bölmələrində yüksək səviyyədə qurulduğu, onlayn formatda təhsilin gələcək inkişaf perspektivləri və müvafiq nəzəri-metodoloji və təcrübi-metodik meyarlar iştirakçıların diqqətinə çatdırılıb. Nüfuzlu beynəlxalq konfransın plenar iclasında çıxış edən professor Asif Hacıyev, eyni zamanda, konfransın materiallarının dərc edildiyi böyük həcmli elmi toplunun beynəlxalq redaksiya heyətinin üzvü kimi də fəaliyyət göstərib.
İkinci tədbir Moskva Pedaqoji Dövlət Universitetində gerçəkləşən ənənəvi “Sivilizasiyaların dialoqu və mədəniyyətlərarası əməkdaşlıq” silsiləsi çərçivəsində onlayn formatda təşkil olunan “Beynəlxalq təhsil və inteqrasiya: yeni çağırışlar və həllər” adlı seminardan ibarət olub. Bir sıra beynəlxalq və federal təşkilatların dəstəyi və yüzə qədər mütəxəssis və təhsil işçisinin iştirakı ilə keçirilən beynəlxalq seminarda professor Asif Hacıyev respublikamızdakı tolerant ictimai mühit, ölkəmizdə yaşayan bütün xalqların milli hüquqlarının tam təmin olunması, ana dillərində təhsilləri və mədəni inkişafı, dövlətçilikdə bərabərhüquqlu iştirakı barədə ətraflı məlumat verib. Azərbaycan multikulturalizm modelini səciyyələndirən Asif Hacıyev bunun parlaq təzahürü kimi, rus dilinin cəmiyyətdə və təhsildə geniş istifadəsi, rus dili və ədəbiyyatının orta məktəblərdə kütləvi tədrisi barədə konkret faktlara əsaslanan analitik məlumat verib. Azərbaycanda kütləvi xarakter daşıyan rusdilli və digər dillərdə tədrisin respublikamızda aparılan dövlət təhsil siyasətinin tərkib hissəsi olduğu, ictimaiyyətimizin tolerantlığından, mədəniyyətimizin polikultur səciyyəsindən, ölkəmizdə müxtəlif din mənsublarının və etnik qrupların vətəndaş həmrəyliyindən, Azərbaycan və rus xalqları arasında səmimi dostluq əlaqələrindən və ölkələrimizin sıx əməkdaşlığından qaynaqlandığı qeyd olunub.
Bölmənin digər xəbərləri
