AZƏRBAYCANLI MİNİATÜR KİTABLAR KRALİÇASI
Zərifə xanım, həqiqətən, miniatürlər kraliçası, heyrətamiz sayda və məzmunca çox maraqlı miniatür kitablar kolleksiyasının sahibidir. O, bu işlə 20 ildir şövqlə məşğul olur. İndi onun kolleksiyasında 47 ölkədə nəşr edilmiş ən müxtəlif mövzularda 4500 kitab vardır. Burada respublikamızın ən yeni tarixinin çox mühüm dövrlərinə aid nəşrlər – müstəqil Azərbaycanın ilk Konstitusiyası, ümummilli liderimiz, Prezident Heydər Əliyevin tərcümeyi-halı, “Əsrin müqaviləsi”, xalqımızın ədəbi irsi, o cümlədən görkəmli Azərbaycan və Şərq şairlərinin lirikası, “Nadir kitablar” bölməsində birləşdirilən nəşrlər, məsələn, “İngiltərə tarixi” (1815, London), A.Puşkinin “Yevgeni Onegin”i (1837, Sankt-Peterburq; şairin sağlığında işıq üzü görüb), Lafontenin “Təmsillər”i (1850, Paris) və s. vardır.
Bütün bu sərvət Zərifə Salahovanın səyləri və Prezident Heydər Əliyevin dəstəyi ilə İçərişəhərdə açılmış miniatür kitab müzeyində saxlanılır. Yeri gəlmişkən, bu, dünyada ilk və hələlik yeganə belə muzeydir.
Lakin Amerika jurnalının müxbiri Zərifə xanımla söhbət edərkən müsahibinin həm də doğma yurdu Azərbaycanın atəşin təbliğatçısı, böyük vətənpərvəri olduğunu duyaraq, bizim üçün ən ağrılı məsələyə - Dağlıq Qarabağ münaqişəsinə də toxunmuşdur.
Demək lazımdır ki, Ermənistanın əsassız ərazi iddiaları üzündən baş vermiş bu münaqişənin səbəblərinin və ağır nəticələrinin izah edilməsini, Azərbaycan haqqında həqiqətin dünyaya çatdırılmasını Zərifə Salahova həmişə özünün vətəndaşlıq borcu bilmişdir. Onun səsi ən müxtəlif beynəlxalq forum və görüşlərin kürsülərindən gəlmişdir.
Amerika jurnalistinin suallarına Zərifə xanım, həmişəki kimi, yenə də ətraflı, əsaslı və inandırıcı cavablar vermişdir. O, Azərbaycana zorla qəbul etdirilmiş və ölkəmizdə bir milyon qaçqın və məcburi köçkünün meydana gəlməsinə gətirib çıxarmış bu ədalətsiz müharibədən ürək ağrısı və vətənpərvərlik qeyrəti ilə danışır. Bildirir ki, bu insanlar öz əzəli torpaqlarından – Ermənistandan və Dağlıq Qarabağdan, habelə Dağlıq Qarabağa bitişik 7 rayondan zor gücünə və vəhşicəsinə qovulub didərgin salınmışlar. Onların ən ülvi arzusu doğma ocaqlarına, ev-eşiklərinə, öz torpaqlarına qayıtmaqdır. Doğrudur, dövlətimiz bu binəsib insanların indiki ağır taleyini yüngülləşdirmək üçün mümkün olan bütün işləri görərək, onlardan ötrü qəsəbələr saldırır, yeni evlər tikdirir, maddi yardım göstərir.
Z.Salahova jurnalistin suallarını cavablandıraraq, ölkəmizin həyatında baş verən müsbət dəyişikliklərdən, iqtisadiyyatımızın yüksək sürətlə inkişaf etməsindən, xalqımızın rifahının getdikcə yaxşılaşmasından ilhamla danışır və nəzərə çarpdırır ki, bütün bunlar ümummilli liderimiz Heydər Əliyevin ətraflı düşünülmüş, məqsədyönlü siyasəti və bu siyasəti indiki Prezidentimiz İlham Əliyevin də eyni ardıcıllıqla davam etdirməsi sayəsində mümkün olmuşdur.
Jurnalist Azərbaycan paytaxtının coşğun mədəni həyatı – yeni teatr tamaşaları, simfonik musiqi konsertləri, Azərbaycan və rus estradası “ulduzlar”ının çıxışları barədə söhbəti də böyük maraqla dinləmişdir.
“Əgər belədirsə, bəs onda nə üçün xeyli adam Azərbaycandan köçüb getmişdir?” kimi əsassız suala Zərifə xanım çox əsaslı şəkildə, fakt və rəqəmlərə istinadla cavab verərək, bu yanlış fikri alt-üst etmişdir. O xatırlatmışdır ki, ötən əsrin 90-cı illərinin əvvəllərində ölkədən köçüb gedənlərin çoxu Heydər Əliyevin yenidən Azərbaycana rəhbərliyə qayıdışından sonra Vətənə dönmüşdür. O kəslər öz torpağına qayıtmırlar ki, onlar qondarma yenidənqurmadan sonra respublikada hökm sürmüş qarmaqarışıqlıq və hərki-hərkilik dövründə dövlət əmlakını, xalqın malını yağmalayaraq özlərinə var-dövlət toplamışdırlar. Ona görə də qaçıb aradan çıxmışlar.
Bir sözlə, Nyu-York jurnalında Zərifə Salahova ilə dərc olunmuş bu söhbət sayəsində Amerikanın rusdilli oxucusu ölkəmiz, onun bugünkü həyatı, uğurla həll etdiyi problemləri barədə kifayət qədər dolğun məlumat almışdır.
Diqqətəlayiq haldır ki, naşirlər də jurnalda xəsislik etməyərək, soydaşımızla müsahibəyə, təxminən 10 səhifə yer ayırmış, üstəlik üz qabığının birinci səhifəsində onun portretini iri planda vermişlər. Jurnalda Zərifə xanım Salahovanın Amerika Birləşmiş Ştatlarında coşğun fəaliyyətini – onun BMT-nin Baş katibi Kofi Annanla, Azərbaycanın BMT-dəki daimi nümayəndəsi Yaşar Əliyevlə, Azərbaycan-Amerika Cəmiyyətinin prezidenti Tomris xanım Azəri ilə, Azərbaycan-Amerika Mədəni Əlaqələr Cəmiyyətinin prezidenti Eldman Qarayevlə və başqaları ilə görüşlərini əks etdirən fotoşəkillər də dərc olunmuşdur.
Bölmənin digər xəbərləri
