AZƏRBAYCANLI ŞAGİRD ƏTRAF MÜHİTİN MÜHAFİZƏSİ ÜZRƏ SƏFİR SEÇİLMİŞDİR
Bakı, 9 iyun (AZƏRTAC). Norveçin Stavanger şəhərində “Young Agenda” Fondu tərəfindən ətraf mühitin mühafizəsi üzrə Beynəlxalq Uşaq Konfransı keçirilmişdir.
Tədbirdə azərbaycanlı məktəblilər də iştirak etmişlər. Konfransda növbəti 2 il üçün ətraf mühitin mühafizəsi kimi vacib missiyanı həyata keçirəcək gənc səfirlər seçilmişdir. Azərbaycanlı şagird Rüfət Dərgahlı səfirlərdən biri olmuşdur.
33 ölkədən 100-dən artıq nümayəndənin iştirak etdiyi beynəlxalq konfransda ölkəmizi Azərbaycan Gənclər İttifaqının (AGİ) Ətraf Mühit və Təhsil Departamentinin rəhbəri Nailə İsmayılova, eləcə də Azərbaycan Gənclər İttifaqı tərəfindən həyata keçirilən SPARE layihəsinin (Enerji və təbii resurslardan istifadəsi üzrə beynəlxalq məktəbli layihəsi) fəalları - 220 nömrəli məktəbin şagirdi Rüfət Dərgahlı və Bakı Türk Liseyinin şagirdi Aytəkin Dərgahlı təmsil etmişlər.
Konfransda Azərbaycan nümayəndələri ölkəmizi layiqincə təmsil etmişlər.
Onlar konfrans zamanı yaradılmış müxtəlif işçi qruplarda aktiv iştirak etməklə yanaşı, ölkəmizdə ətraf mühitin mühafizə olunması sahəsində həyata keçirilən tədbirlər, AGİ-nın bu istiqamətdə layihələri, ermənilərin Azərbaycanın təbiətinə vurduqları ziyan haqqında və ölkəmizə qarşı təcavüzü barədə məlumat vermişlər.
Konfrans çərçivəsində uşaqlar enerji resurslarının istifadəsi və onların ətraf mühitə təsiri barədə müzakirələr aparmış, müxtəlif təlimlərdə iştirak etmişlər.
######
 |
 |
Bölmənin digər xəbərləri
