Azərbaycanlıların soyqırımı əsrin faciəsidir
Lənkəran, 30 mart (AZƏRTAC). Lənkəran Dövlət Universitetində (LDU) 31 mart-Azərbaycanlıların soyqırımı gününə həsr olunmuş konfrans keçirilmişdir.
AZƏRTAC xəbər verir ki, universitetin müəllim və tələbələri əvvəlcə Lənkəran şəhərinin mərkəzində ucaldılmış azərbaycanlıların soyqırımı abidəsi önünə əklillər və gül dəstələri düzərək soyqırımı qurbanlarının xatirəsini ehtiramla yad etmişlər.
Konfransda çıxış edən ali təhsil müəssisəsinin rektoru, Əməkdar Elm Xadimi, professor Asəf İsgəndərov erməni millətçilərinin əsassız torpaq iddialarından, Azərbaycan Respublikasının Prezidenti İlham Əliyevin dövlətçiliyimiz naminə apardığı haqq işindən söhbət açaraq bildirmişdir ki, dövlətimizin başçısının rəhbərliyi ilə Azərbaycanın ərazi bütövlüyü tezliklə təmin olunacaqdır.
Universitetin tarix və fəlsəfə kafedrasının dosenti, tarix elmləri namizədi Əliağa Baxşıyev “Azərbaycanlıların soyqırımı əsrlərin faciəsidir” mövzusunda məruzə etmişdir
Konfransda çıxış edənlər bildirmişlər ki, soyqırımı hadisələri Lənkərandan da yan keçməmiş, 1918-ci il mart-aprel aylarında qəzada 40-dək kənd yandırılmış, günahsız insanlar qətlə yetirilmişlər.
LDU-da, həmçinin azərbaycanlıların soyqırımına həsr olunmuş kitab sərgisi təşkil edilmiş, soyqırımı ilə bağlı Azərbaycan həqiqətlərinin dünya ictimaiyyətinə çatdırılması məqsədilə virtual aksiya keçirilmişdir.
Bölmənin digər xəbərləri
