AZƏRBAYCANLILARIN SOYQIRIMI GÜNÜ RUMINİYADA QEYD OLUNMUŞDUR
Bakı, 31 mart (AZƏRTAC). 31 Mart - Azərbaycanlıların soyqırımı günü ilə bağlı Azərbaycanın Rumıniyadakı səfirliyində tədbir keçirilmişdir.
Tədbirdə Rumıniya-Azərbaycan Dostluq Cəmiyyətinin, Azərbaycan-Rumıniya Mədəniyyət və Gənclər Assosiasiyasının, Rumıniya-Azərbaycan Sənaye və Ticarət Palatasının idarə heyətinin üzvləri, Heydər Əliyev Fondunun və Dövlət Neft Şirkətinin Rumıniyadakı nümayəndəliklərinin əməkdaşları, Rumıniyada yaşayan və təhsil alan azərbaycanlılar, türk-tatar icmalarının nümayəndələri və jurnalistlər iştirak etmişlər.
Səfir Eldar Həsənov azərbaycanlıların soyqırımının tarixindən danışmış, xüsusi olaraq, 1905-1907-ci ,1918-ci illərdə ermənilər tərəfindən Bakı, Şamaxı, Quba, Qarabağ, Zəngəzur, İrəvan, Naxçıvan, Ordubad, Eçmiədzin, Cavanşir və Qazaxda törədilmiş vəhşiliklər zamanı minlərlə azərbaycanlının öldürüldüyünü, on minlərlə insanın evlərindən didərgin düşdüyünü bildirmişdir.
Ümummilli lider Heydər Əliyevin “Azərbaycanlıların soyqırımı haqqında” Fərmanının böyük tarixi əhəmiyyət daşıdığı vurğulanmışdır.
Tədbirdə soyqırımı qurbanlarının xatirəsi bir dəqiqəlik sükutla yad edilmiş, ermənilərin törətdikləri qətliamların dəhşətlərini əks etdirən fotoşəkillər nümayiş olunmuşdur.
Azərbaycanlıların soyqırımı günü ilə bağlı hazırlanmış məlumat Rumıniya parlamentinə, rəsmi dövlət orqanlarına, qeyri-hökumət təşkilatlarına, Rumıniyada fəaliyyət göstərən diplomatik korpusa göndərilmiş, Rumıniya kütləvi informasiya vasitələrində işıqlandırılmışdır.
Bölmənin digər xəbərləri
