“AZƏRBAYCANLILARIN SOYQIRIMI VƏ DEPORTASİYASI: TARİXİ YADDAŞ VƏ MÜASİRLİK” MÖVZUSUNDA ELMİ KONFRANS KEÇİRİLMİŞDİR
Naxçıvan, 1 aprel (AZƏRTAC). Azərbaycan Milli Elmlər Akademiyasının Naxçıvan bölməsində “Azərbaycanlıların soyqırımı və deportasiyası: tarixi yaddaş və müasirlik” mövzusunda elmi konfrans keçirilmişdir.
Konfransda bölmənin sədri, akademik İsmayıl Hacıyev çıxış edərək bildirmişdir ki, bu təqvim son yüz ildə Azərbaycan tarixində baş vermiş faciəli hadisələrin xalqın yaddaşındakı qanlı izlərini özündə əks etdirir. Azərbaycanlıların kütləvi şəkildə qırılmasını, repressiyalara məruz qalmasını XX yüzilliyin dünya tarixinin ən qanlı səhifələrindən biri hesab etmək olar. 1918-ci il martın 31-də Bakı kommunası və erməni daşnakları Azərbaycanda kütləvi qırğınlar, qətliamlar törətməklə bəşər tarixində misli görünməmiş soyqırıma imza atmışlar.
Bildirilmişdir ki, tarixdə baş vermiş ağır və faciəli hadisələrin səbəbləri mütəmadi izah edilməli, təqsirkar şəxslər və xalqımıza düşmən mövqe tutanlar ifşa olunmalı, qətliamların dünya ictimaiyyətinə çatdırılması üçün təbliğat işi genişləndirilməlidir.
Tədbirdə çıxış edən bölmənin əməkdaşları Azərbaycan xalqının 200 ilə yaxın bir dövrdə üzləşdiyi faciələrdən, tarixi düşmənlərimiz olan ermənilərin və onların havadarlarının işğalçılıq əməllərindən və törətdikləri qırğınlardan danışmışlar.
Bölmənin digər xəbərləri
