“Azəri-Çıraq-Günəşli” müqavilə sahəsinə daxil olan “Azəri” yatağının mərkəzi hissəsinin işlənilməsi layihəsi cədvəl üzrə həyata keçirilir və indiyədək işlərin 70 faizi yerinə yetirilmişdir. Azərbaycan Beynəlxalq Əməliyyat Şirkətinin “Azəri” layihəsi üzrə vitse-prezidenti Nil Şou sentyabrın 9-da keçirilmiş mətbuat konfransında bu barədə məlumat vermişdir. Onun sözlərinə görə, bu il həmin layihəyə, nəzərdə tutulduğu kimi, 1,7 milyard dollar vəsait qoyulacaqdır. Son üç ay ərzində platformada quraşdırılmaq üçün İsveçdən yaşayış bloku gətirilmişdir, Fransadan qazma modulu göndərilir. Sualtı boru kəmərlərinin çəkilişinə başlanmışdır.
Hazırda “Azəri” layihəsində çalışan Azərbaycan vətəndaşlarının sayı 6 minə çatmışdır.
ABƏŞ-in vitse-prezidenti ilin axırınadək görüləcək işlərdən danışaraq bildirmişdir ki, STB-01 barjının modernləşdirilməsi, mərkəzi “Azəri” üçün dayaq blokunun quraşdırılması başa çatdırılacaqdır. Kompressor və su-nasos stansiyalarının özülünün tikintisi də sona yetəcəkdir. Qazma qurğusuna neft kəməri çəkildikdən sonra ona paralel qaz kəmərinin inşasına başlanacaqdır.
