“AZƏRİKİMYA” İSTEHSALAT BİRLİYİNDƏ YAŞILLIQ ZOLAQLARININ SALINMASINA XÜSUSİ DİQQƏT YETİRİLİR
Bakı, 10 iyun (AZƏRTAC). 2010-cu ilin “Ekologiya ili” elan olunması ARDNŞ-in idarə və müəssisələrində, o cümlədən “Azərikimya” İstehsalat Birliyində (İB) aparılan yaşıllaşdırma işlərinin daha geniş vüsət almasına təkan vermişdir.
Kimyaçılar qarşısında Sumqayıtın sənaye zonasında, həmçinin Sumqayıt-Quba magistral yolunun geniş bir ərazisində yaşıllıq zolağı salmaq vəzifəsi qoyulmuşdur. Kütləviliyi ilə yadda qalmış aprel iməciliyində Sumqayıt kimyaçıları ilə yanaşı, ARDNŞ-in Ekologiya İdarəsinin, həmçinin “EKOL Mühəndislik Xidmətləri” QSC-in 2 mindən artıq əməkdaşı yüksək fəallıq göstərmiş, həmin ərazidə 5 mindən artıq ağac əkilmiş, geniş təmizlik və abadlıq işləri aparılmışdır.
Hazırda kimyaçılar tinglərin yetişdirilməsi işi ilə bilavasitə İB-in müəssisələrində məşğul olurlar. “Azərikimya”ya daxil olan zavodların ərazisində tinglik sahəsi yaradılmışdır. “Üzvi sintez” zavodunda çinar, sərv, iydə, zeytun, göyrüş və müxtəlif dekorativ ağaclardan ibarət 8 mindən artıq ting yetişdirilir. Etilen-polietilen zavodunda indiyədək ümumilikdə 25 min ting vurulmuş, İsmayıllı rayonundan gətirilmiş 1 kiloqram alpan ağacı toxumu əkilmişdir. Səthi Aktiv Maddələr zavodunda və “Kimyaçı” mədəniyyət sarayının ərazisində isə ümumilikdə 4 min 700 ting becərilir. “Kimyaçı” mədəniyyət sarayının 3,6 hektarlıq sahəsində qısa müddətdə ağacların sayı 1425-dən 3 min 875-ə çatdırılmış, 1200 türkmən çinarı, ağ çinar və iydə tingi yetişdirilmişdir.
Ümumilikdə İB-in tabeçiliyində olan müəssisələrdə 37 min 200 ting vurulmuş, 5 kiloqrama yaxın toxum əkilmişdir. Cari ilin sonunadək Bakı-Quba magistral yolu boyunca salınacaq yaşıllıq zolağında 75-80 min ağacın əkilməsi planlaşdırılır. Artıq ağacların əkiləcəyi yerlər, yaşıllıq zolağının salınacağı sahələr istehsalat tullantılarından və metal qırıntılarından təmizlənmiş, torpaq hamarlanmışdır. Ağacların normal və davamlı suvarılması üçün 13 kilometr uzunluğunda su xəttinin çəkilməsi işləri davam etdirilir. Yaşıllıq zonasında nəqliyyat vasitələrinin hərəkəti üçün 6-8 metr enində yol çəkilməsi və işçilərin istirahəti üçün zolaq boyu 3 köşkün qoyulması planlaşdırılır.
Bölmənin digər xəbərləri
