AzTU ilə Müdafiə Sənayesi Nazirliyi arasında əməkdaşlıq genişləndirilir
Bakı, 3 iyul, AZƏRTAC
Azərbaycan Texniki Universitetində (AzTU) müdafiə sənayesi nazirinin müavini Hidayət Əzimovun rəhbərlik etdiyi nümayəndə heyəti ilə görüş keçirilib.
Universitetdən AZƏRTAC-a bildirilib ki, görüşdə universitetin rektoru Vilayət Vəliyev AzTU ilə Müdafiə Sənayesi Nazirliyi arasında uzun illərdir davam edən səmərəli əməkdaşlığın əhəmiyyətini vurğulayıb. O, universitetdə təhsilin keyfiyyətinin yüksəldilməsi istiqamətində həyata keçirilən yeniliklər, xüsusilə müdafiə sənayesi üçün yüksəkixtisaslı mühəndis kadrlarının hazırlandığı Xüsusi texnika və texnologiya fakültəsində aparılan islahatlar barədə məlumat verib.
Rektor qeyd edib ki, fakültədə idarəetmə modelinin təkmilləşdirilməsi, təhsil və elmi fəaliyyətin müdafiə sənayesinin müasir tələblərinə uyğunlaşdırılması istiqamətində ardıcıl tədbirlər həyata keçirilir. Bu addımlar universitet-sənaye əməkdaşlığının gücləndirilməsinə və müdafiə sənayesi üçün innovativ həllərin hazırlanmasına xidmət edir.
Vilayət Vəliyev qeyd edib ki, 2025-ci il mayın 26-da Elm və Təhsil Nazirliyi ilə Müdafiə Sənayesi Nazirliyi arasında imzalanmış anlaşma memorandumundan irəli gələn fəaliyyətlər AzTU-da mərhələli şəkildə icra olunur. Bu çərçivədə AzTU ilə Gebze Texniki Universiteti arasında 2026-2027-ci tədris ilindən materiallar mühəndisliyi ixtisasının enerji və enerjitutumlu materiallar ixtisaslaşması üzrə magistratura səviyyəsində ikili diplom proqramına ilk qəbul həyata keçiriləcək.
Müdafiə sənayesi nazirinin müavini Hidayət Əzimov isə AzTU ilə əməkdaşlığın strateji əhəmiyyət daşıdığını vurğulayaraq, Elm və Təhsil Nazirliyi ilə Müdafiə Sənayesi Nazirliyinin birgə təşəbbüsü ilə ikinci dəfə təşkil olunacaq İxtisaslaşmış Akademik Tədris Proqramının həyata keçirilməsində universitet rəhbərliyinin dəstəyini yüksək qiymətləndirib. Onun sözlərinə görə, proqram müdafiə sənayesinin ehtiyaclarına uyğun yüksəkixtisaslı mühəndis kadrlarının hazırlanmasına mühüm töhfə verir.
Nazir müavini AzTU ilə Gebze Texniki Universiteti arasında həyata keçiriləcək ikili diplom proqramının ölkənin elmi-texnoloji potensialının gücləndirilməsi və müdafiə sənayesinin yüksəkixtisaslı mütəxəssislərlə təmin olunması baxımından mühüm əhəmiyyət kəsb etdiyini bildirib.
Qeyd edək ki, görüşdə müdafiə sənayesi sahəsində birgə layihələrin həyata keçirilməsi, elmi-tədqiqat fəaliyyətinin genişləndirilməsi, innovativ texnologiyaların inkişafı, insan kapitalının gücləndirilməsi, mütəxəssis hazırlığı, tələbələrin istehsalat təcrübəsinin təşkili və universitet-sənaye əməkdaşlığının yeni istiqamətləri ətrafında fikir mübadiləsi aparılıb.
Bölmənin digər xəbərləri
