Bakı beynəlxalq tədbirlər üçün etibarlı və müasir məkandır – ŞƏRH
Bakı, 13 may, AZƏRTAC
Bir neçə gündən sonra paytaxt Bakı dünyanın ən böyük şəhərsalma platformalarından biri olan Ümumdünya Şəhərsalma Forumunun 13-cü Sessiyasına (WUF13) ev sahibliyi edəcək. Bu tədbir yalnız şəhərsalma məsələlərinin müzakirə olunduğu beynəlxalq forum deyil, eyni zamanda, Azərbaycanın müasir inkişaf modelinin, təşkilatçılıq bacarığının və dayanıqlı inkişaf strategiyasının təqdim olunduğu mühüm qlobal tribuna kimi çıxış edir.
Bu sözləri AZƏRTAC-a açıqlamasında Milli Məclisin deputatı Könül Nurullayeva deyib.
O qeyd edib ki, Prezident İlham Əliyevin Bakı Olimpiya Stadionunda forumla bağlı görülən hazırlıq işləri ilə yerində tanış olması dövlətin tədbirə verdiyi yüksək əhəmiyyətin bariz nümunəsidir. Bu, həm də Azərbaycanın beynəlxalq tədbirlərin təşkili sahəsində formalaşdırdığı peşəkar yanaşmanın davamı kimi qiymətləndirilir. Son illərdə ölkəmiz Avropa Oyunları, İslam Həmrəyliyi Oyunları, Qoşulmama Hərəkatının Zirvə Toplantısı, COP29 kimi mötəbər tədbirlərə uğurla ev sahibliyi etməklə beynəlxalq ictimaiyyətin etimadını qazanıb. WUF13 də həmin uğurlu xəttin davamı kimi xüsusi önəm daşıyır.
“BMT-nin Məskunlaşma Proqramı və Azərbaycan Hökuməti tərəfindən birgə təşkil olunan forum “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusuna həsr edilib. Bu mövzu hazırda dünyada sürətlə artan urbanizasiya, iqlim dəyişiklikləri, sosial bərabərlik və təhlükəsiz yaşayış mühiti kimi qlobal çağırışların fonunda xüsusi aktuallıq daşıyır. Forum çərçivəsində şəhərlərin gələcəyi, ekoloji dayanıqlılıq, rəqəmsal transformasiya, sosial inklüzivlik, nəqliyyat infrastrukturu və “ağıllı” idarəetmə modelləri geniş müzakirə ediləcək. İndiyədək 180 ölkədən 32 mindən çox iştirakçının qeydiyyatdan keçməsi forumun qlobal əhəmiyyətini göstərməklə yanaşı, Bakının beynəlxalq tədbirlər üçün etibarlı və müasir məkan kimi qəbul edildiyini də təsdiqləyir. Dünyanın müxtəlif ölkələrindən dövlət və hökumət nümayəndələrinin, nazirlərin, beynəlxalq təşkilat rəhbərlərinin, şəhərsalma üzrə ekspertlərin, akademik dairələrin, özəl sektor təmsilçilərinin və vətəndaş cəmiyyəti nümayəndələrinin Bakıya gəlməsi Azərbaycan üçün mühüm diplomatik və iqtisadi imkanlar yaradır.
Forumun keçiriləcəyi Bakı Olimpiya Stadionu müasir texnoloji imkanlarla təchiz olunub, iştirakçıların təhlükəsizliyi və rahatlığı üçün bütün zəruri infrastruktur qurulub. Nəqliyyat-logistika məsələləri, təhlükəsizlik tədbirləri, media fəaliyyəti və könüllü proqramları yüksək səviyyədə koordinasiya edilir”, - deyə deputat bildirib.
Könül Nurullayeva vurğulayıb ki, forumun Azərbaycan üçün xüsusi əhəmiyyət daşıyan istiqamətlərindən biri postmünaqişə dövründə həyata keçirilən yenidənqurma və bərpa siyasətinin beynəlxalq ictimaiyyətə təqdim olunmasıdır. İşğaldan azad edilmiş Qarabağ və Şərqi Zəngəzurda həyata keçirilən genişmiqyaslı layihələr artıq dünyanın diqqət mərkəzindədir. Regionda tətbiq olunan “ağıllı şəhər” və “ağıllı kənd” konsepsiyaları, yaşıl enerji zonalarının yaradılması, müasir infrastruktur layihələri və ekoloji yanaşma Azərbaycanın yeni inkişaf modelinin əsas komponentləri kimi təqdim olunur. Ağdam, Füzuli, Şuşa, Zəngilan və digər şəhərlərdə aparılan yenidənqurma işləri yalnız dağıdılmış ərazilərin bərpası deyil, həm də tamamilə yeni şəhərsalma modelinin qurulması kimi qiymətləndirilir. Burada rəqəmsal idarəetmə sistemləri, alternativ enerji mənbələri, ekoloji tikinti standartları və müasir nəqliyyat həlləri tətbiq edilir. WUF13 çərçivəsində bu təcrübənin beynəlxalq ekspertlərə təqdim olunması Azərbaycanın innovativ yanaşmasının qlobal səviyyədə tanınmasına mühüm töhfə verəcək.
Bölmənin digər xəbərləri
