Bakı Uşaq və Gənclər Teatrı Mingəçevirdə tamaşa göstərib
Bakı, 6 aprel, AZƏRTAC
Bakı Uşaq və Gənclər Teatrının tariximizin qan yaddaşına, zaman-zaman azərbaycanlılara qarşı törədilmiş soyqırımlarına həsr olunmuş “Qucaqla məni” tamaşası Mingəçevir Dövlət Dram Teatrında göstərilib.
AZƏRTAC xəbər verir ki, səhnə əsəri Mingəçevir Şəhər İcra Hakimiyyəti, Bərdə Regional Mədəniyyət İdarəsi və Yevlax Regional Təhsil İdarəsinin dəstəyi ilə təqdim olunub.
Cəfər Cabbarlının “Əhməd və Qumru” hekayəsinin motivləri əsasında dramaturq Arzu Soltanın qələmə aldığı, Əməkdar artist İntiqam Soltanın səhnələşdirdiyi, canlı musiqinin müşayiəti ilə nümayiş olunan tamaşada rolları Əfruz Əliyeva və Ədalət Ağaverdiyev ifa ediblər.
Aktyorların məharətli çıxışı səhnə əsərini daha baxımlı edib, tamaşa maraqla qarşılanıb.
Bölmənin digər xəbərləri
