Bakı və İstanbul metropolitenləri arasında əlaqələr genişləndirilir
Bakı, 3 iyun, AZƏRTAC
İstanbul metropoliteninin baş direktoru Özgür Soy Bakı metropolitenində qısamüddətli işgüzar səfərdə olub.
Bakı Metropoliteni” QSC-dən AZƏRTAC-a bildirilib ki, qonaq Bakı metropoliteninin Təlim-tədris mərkəzində QSC-nin sədri Zaur Hüseynov ilə görüşüb. Görüşdə Bakı metropoliteninin digər rəhbər və vəzifəli şəxsləri də iştirak edib. Böyük məmnuniyyət hissini ifadə edərək görüşü “bir millət iki dövlət”in metropolitenlərinin qardaşlıq ruhunda əməkdaşlığının təzahürü adlandıran Zaur Hüseynov Bakı metrosu ilə tanışlığın təlim-tədris mərkəzindən başlanmasını burada metropolitenin bütün infrastrukturu barədə ilkin ətraflı və geniş məlumatların verilməsi baxımından daha münasib olduğunu bildirib.
Əlaqələrin dərinləşməsi və zənginləşməsi baxımından istənilən səviyyədə görüşlərin əhəmiyyətli olduğunu deyən Səhmdar Cəmiyyətin sədrinin müşayiəti ilə guşələr, tədris, təlim və trenajor otaqları vasitəsilə metropoliten barədə bütün məlumatları alan Özgür Soy Mərkəzin akademik səviyyədə təşkil edilməsini və bu istiqamətdə Bakı metropoliteninin təcrübəsini öyrənərək İstanbulda da belə bir Mərkəz qura biləcəklərini deyib.
Mərkəzdə Özgür Soya Bakı metropoliteninin tarixi, son illərdə həyata keçirilmiş irimiqyaslı layihələrlə əldə olunmuş nailiyyətlər barədə məlumatlar verilib. Müəssisənin strukturu, habelə təlim-tədris mərkəzi, vaqonların əsaslı təmiri, dəmir-beton konstruksiyaları istehsalatı sahəsi, diaqnostika kompleksi, yeni qatarlar və stansiyalar, depoda tətbiq edilən bir sıra texnologiyalar Özgür Soyun xüsusi marağına səbəb olub. O, korporativ sosial məsuliyyət, o cümlədən işçilərin istirahət və asudə vaxtının təşkili, sosial layihələri də təqdirəlayiq hesab edib.
Təqdimat əsasında qonağın diqqətini çəkən və İstanbul metrosunun təcrübəsi barədə fikir mübadiləsi də aparılıb. QSC sədri Zaur Hüseynov İstanbul metrosunun qabaqcıl təcrübəsindən faydalanmağın mümkünlüyünü qeyd edib. Bu mənada o, yeni Bənövşəyi xətdə Fransanın “Thales” şirkəti ilə əməkdaşlıq şəraitində tətbiq edilən müasir yeniliklərin mənimsənilməsi zamanı Bakı metropoliteninin gənc kadrlarının Kanadanın Toronto, BƏƏ-nin Dubay şəhərləri ilə yanaşı, İstanbul metrosunda da təcrübə mübadiləsi keçdiklərini, eləcə də kadr hazırlığı ilə bağlı geniş təmasdan söz açıb.
Özgür Soy isə öz növbəsində, təlim-tədris mərkəzi ilə tanışlıq zamanı həm kadr, həm də bir sıra spesifik sahələrdə Bakı metropoliteninin təcrübəsinə ehtiyaclarını və məmnuniyyətlə davamlı əlaqələrin qurulmasında maraqlı olduqlarını vurğulayıb və Zaur Hüseynov başda olmaqla nümayəndə heyətini İstanbul metrosuna dəvət edib.
Görüş “Nərimanov” elektrik deposunda davam edib. Burada ilkin təqdimatda qeyd edilən sahələrdən unikal layihə əsasında inşa olunaraq ən müasir avadanlıqlarla təchiz edilmiş mərkəzləşmiş məntəqə növbətçisinin, videomüşahidə, işarəvermə avadanlıqları sahələri, eləcə də depo ərazisində qatarların hərəkətinin təşkilində tətbiq edilmiş yeni sistemlər, deponun funksional fəaliyyəti barədə ətraflı məlumat təqdim edilib və müzakirələr aparılıb.
Qonağa vaqonların qaldırma təmiri, qatarların cari baxış və qulluğunun aparıldığı qanovlar və buradakı müasirləşmə tədbirləri barədə də məlumat verilib. Metropoliten infrastrukturunun diaqnostikası kompleksi İstanbul metrosu rəhbərinin diqqətini xüsusilə çəkərək bu sahədə də əməkdaşlıqdan məmnun olacaqlarını dilə gətirib.
Bu görüşlərdən sonra Özgür Soy bədii-memarlıq kompozisiya həlli ilə dünya metropolitenlərinin incilərindən hesab edilən “Nizami” stansiyası ilə tanış olub. Burada qonağa ulu öndər Heydər Əliyevin gərgin və fədakar əməyi nəticəsində özünəməxsus sənət nümunəsinə çevrilmiş stansiyanın inşası zamanı rast gəlinən çətinliklər, dahi mütəfəkkir və şairin həyat və yaradıcılığı, pannolarda əks olunan təsviri sənət nümunələri, habelə Azərbaycan Prezidenti İlham Əliyevin sərəncamı ilə 2021-ci ilin “Nizami Gəncəvi İli” elan edilməsi çərçivəsində açılmış sərgi barədə ətraflı məlumat verilib.
Səfərin sonunda tərəflər səmimi söhbətlər və müzakirələrin faydalı işbirliyinə yol açdığını vurğulayıblar. Bu isə Bakı metropoliteninin davamlı genişlənən beynəlxalq əlaqələrinin cari ildən daha bir mühüm istiqamətdə yeni müstəvi üzərinə keçiriləcəyinə əminlik yaradır.
Bölmənin digər xəbərləri
