Yarışda ölkəmizi 5 idmançı - Dinara Gimatova, Dina Qorina, Valeriya Yeqay, Nurcahan Əsgərova və Vəfa Hüseynova təmsil edirlər.

Həmin günün səhəri idmançı qızların müsabiqədənkənar çıxışları oldu, sonra “B” qrupunda mübarizə aparan gimnastlar öz ustalığını nümayiş etdirdilər. Müsabiqədənkənar çıxış edənlər arasında ən yaxşı nəticələri Rusiya idmançıları göstərdilər. Azərbaycan idmançısı Valeriya Yeqay 20,5 bal toplayaraq, bu kateqoriyada 4-cü yeri tutdu. “B” kateqoriyasında Rusiya, İspaniya və İsrail idmançıları fərqləndilər.

Axşam isə yarışların təntənəli açılış mərasimi oldu. Mərasimdə Milli Məclisin sədri Murtuz Ələsgərov, Baş nazir, Milli Olimpiya Komitəsinin prezidenti İlham Əliyev, Prezidentin İcra Aparatının rəhbəri Ramiz Mehdiyev, Baş nazirin birinci müavini Artur Rasizadə, Azərbaycan Bədii Gimnastika Federasiyasının prezidenti Mehriban xanım Əliyeva iştirak edirdilər.

Mərasim bədii proqramla başlandı. Proqramda milli musiqi alətlərində ifa olunan melodiyalar səsləndi, rəqs kollektivləri çıxış etdilər.

Sonra iştirakçıların paradı başlandı.

Mərasimi respublikanın gənclər, idman və turizm naziri Əbülfəz Qarayev açdı.

GƏNCLƏR, İDMAN VƏ TURİZM NAZİRİ

ƏBÜLFƏZ QARAYEVİN ÇIXIŞI

-Əziz idmançılar!

Hörmətli məşqçilər, hakimlər, xanımlar və cənablar!

Sizi Azərbaycan Respublikasının paytaxtı Bakı şəhərində görməkdən şərəf hissi duyuruq. Dünya kubokunun mərhələ yarışının iştirakçılarını ürəkdən salamlayır, sizə “Xoş gəlmisiniz!” deyirik.

Azərbaycanda beynəlxalq rəsmi yarışların keçirilməsi son illər gözəl ənənəyə çevrilmişdir. Respublikamızda təşkil edilmiş yarışlar zamanı qonaqlar Vətənimizdə gedən quruculuq işlərinin şahidi olmuş, Azərbaycan haqqında həqiqətləri öz ölkələrinə çatdırmışlar.

Azərbaycan Respublikası müstəqilliyinin 12-ci ilini yaşamaqdadır. Zəngin idarəçilik təcrübəsinə, yüksək mənəvi keyfiyyətlərə, tükənməz potensiala malik müdrik və qətiyyətli rəhbər cənab Heydər Əliyev respublikamızın iqtisadiyyatının, elm, təhsil və mədəniyyətinin inkişafına, xalqın sosial vəziyyətinin yaxşılaşdırılmasına, dövlətçiliyimizin möhkəmləndirilməsinə misilsiz xidmətlər göstərmişdir. Digər sahələrlə yanaşı, idman da böyük inkişaf yoluna çıxmışdır.

1997-ci ildə Milli Məclisin deputatı, Azərbaycan Respublikası Dövlət Neft Şirkətinin birinci vitse-prezidenti cənab İlham Əliyevin Milli Olimpiya Komitəsinin Prezidenti seçilməsi ölkəmizdə olimpiya hərəkatının sürətlə inkişafına səbəb olmuşdur. Respublikamızın bir çox yerlərində müasir idman komplekslərinin tikilməsi, idmançıların əldə etdiyi uğurlar buna əyani sübutdur.

Azərbaycan idmançıları, bütün idman ictimaiyyəti ölkəmizin Prezidenti möhtərəm Heydər Əliyevin Milli Olimpiya Komitəsinin Prezidenti, gənclərin lideri cənab İlham Əliyevi respublikanın Baş naziri vəzifəsinə təyin etməsini böyük ruh yüksəkliyi ilə qarşılamışlar. Bu münasibətlə cənab İlham Əliyevi səmimi qəlbdən təbrik edir, ona şərəfli işində böyük nailiyyətlər arzulayırlar.

Azərbaycan gəncliyi öz sözlərini dünyanın bütün idman meydanlarında deməyə müvəffəq olmuşdur və oktyabrın 15-də müdrik rəhbərimiz Heydər Əliyevi yekdilliklə dəstəkləyəcəyini bəyan edir.

Əziz dostlar, biz buraya bədii gimnastika üzrə Dünya kuboku uğrunda mərhələ yarışının açılış mərasiminə toplaşmışıq. Vaxtilə Azərbaycan idmançıları ittifaq və beynəlxalq miqyaslı bir çox rəsmi yarışlarda uğurlu çıxışları ilə idmansevərlərə sevinc bəxş etmişlər. Hazırda ölkəmizdə bədii gimnastika bölmələrində minədək istedadlı gənc ustalığını artırır.

Bizə etimad göstərib bu yarışın ölkəmizdə təşkilinə razılıq verdiyinə görə, mən bütün gənc idmançılar adından Beynəlxalq Gimnastika Federasiyasına dərin minnətdarlığımı bildirir və gələcəkdə də belə mötəbər yarışların Azərbaycanda keçirilməsinə razılıq verəcəklərinə inanıram.

17 ölkəni təmsil edən idmançıların iştirak etdiyi bu yarışın yüksək səviyyədə keçirilməsinə bir çox təşkilatlar və şəxslər yaxından kömək göstərmişlər. Azərbaycan Gimnastika Federasiyasının prezidenti Mehriban xanım Əliyevanın və Beynəlxalq Gimnastika Federasiyasının bədii gimnastika üzrəTexniki Komitəsinin sədri xanım Eqle Abruzininin fəaliyyətini xüsusi minnətdarlıqla qeyd etmək istəyirəm.

Azərbaycanın idman ictimaiyyəti əmindir ki, Bakı şəhərində keçirilən bu yarış əsl idman bayramına çevriləcək, ölkəmizdə bədii gimnastikanın inkişafına təkan verəcəkdir. Mən bütün qonaqları bir daha səmimi qəlbdən salamlayır və onlara uğurlar arzulayıram.

Qoy, güclülər qalib gəlsin!

X X X

BEYNƏLXALQ GİMNASTİKA FEDERASİYASININ

BƏDİİ GİMNASTİKA ÜZRƏ TEXNİKİ KOMİTƏSİNİN

PREZİDENTİ XANIM EQLE ABRUZİNİNİN

Ç I X I Ş I

-Azərbaycan Respublikasının hörmətli Baş naziri, Milli Olimpiya Komitəsinin prezidenti cənab İlham Əliyev!

Hörmətli gənclər, idman və turizm naziri cənab Əbülfəz Qarayev!

Azərbaycan Gimnastika Federasiyasının hörmətli prezidenti Mehriban xanım Əliyeva!

Hörmətli xanımlar və cənablar!

Əziz idmançılar!

2003-2004-cü illər gimnastika üzrə Dünya kubokunun ikinci seçmə mərhələsinə xoş gəlmisiniz. Bu gün başlanan Bakı beynəlxalq turniri Azərbaycanda bədii gimnastika üzrə keçirilən ilk mötəbər yarışdır və iştirakçılarının sayına görə böyük uğur qazanmışdır. Burada dünyanın ən yaxşı gimnastlarının əksəriyyəti iştirak edir. Mən Azərbaycan Gimnastika Federasiyasına, onun prezidentinə və bütün əməkdaşlarına yarışın təşkilinə görə minnətdarlığımı bildirmək istəyirəm. Əminəm ki, bu turnir bütün iştirakçıları razı salacaqdır. Mən bütün gimnastlara uğurlar arzulayıram. Qoy, onlardan hər biri layiq olduqları nəticələri göstərsin.

X X X

Azərbaycanın Dövlət himni əzəmətlə səsləndi.

Qədim Qız qalasının maketi üzərində turnirin məşəli alovlandırılırdı. Dünya və Avropa çempionları adına layiq görülmüş Rusiya Federasiyasının yığma komandası nümunəvi proqramla çıxış etdi.

Bakı İdman-Konsert Kompleksində “Olimpiya marşı” səsləndirildi. Açılış mərasiminə toplaşmış 8 mindən çox tamaşaçı ölkəmizin idmançılarının olimpiya oyunlarında çıxışlarından bəhs edən videokadrların nümayişini gurultulu, sürəkli alqışlarla qarşıladılar.

Rəsmi hissə başa çatdıqdan sonra “A” kateqoriyası üzrə yarışlara strat verildi. İdmançılar çoxnövçülükdə şəxsi birincilik uğrunda mübarizəyə başladılar.

Şəxsi birincilikdə Rusiya idmançısı Alina Kabayeva 108,13 bal toplayaraq qalib gəldi. Onun həmyerlisi İrina Çaşina gümüş medalın sahibi oldu. 102,03 bal toplayan Azərbaycan idmançısı Dinara Gimatova bürünc medal qazandı. Medalları Azərbaycan Bədii Gimnastika Federasiyasının prezidenti Mehriban xanım Əliyeva, gənclər, idman və turizm naziri Əbülfəz Qarayev və Beynəlxalq Gimnastika Federasiyasının bədii gimnastika üzrə Texniki Komitəsinin prezidenti xanım Eqle Abruzini təqdim etdilər.

Avqustun 10-da ayrı-ayrı növlər üzrə yarışlar keçiriləcək və turnirin təntənəli bağlanış mərasimi olacaqdır.

***

AZƏRBAYCANIN BAŞ NAZİRİ İLHAM ƏLİYEVİN DÖVLƏT TELEVİZİYASININ MÜXBİRİNƏ MÜSAHİBƏSİ

Avqustun 9-da Azərbaycanın Baş naziri, Milli Olimpiya Komitəsinin prezidenti İlham Əliyev Azərbaycan dövlət televiziyasının müxbirinə müsahibə vermişdir. SUAL: İlham müəllim, son vaxtlar Azərbaycanda beynəlxalq yarışların, müxtəlif idman tədbirlərinin keçirilməsi ənənə halını almışdır. Bədii gimnastika üzrə bugünkü yarışın keçirilməsi də Azərbaycanın idman tarixində mühüm hadisə deyilmi? CAVAB: Mən razıyam. Doğrudan da bu, Azərbaycanın idman tarixində mühüm hadisədir, əlamətdar bir haldır. Artıq bir neçə dəfə Azərbaycanda beynəlxalq yarışlar, dünya, Avropa çempionatları, kubok yarışları keçirilibdir. Bu, onu göstərir ki, beynəlxalq idman qurumlarının Azərbaycana münasibəti çox xoşdur, bizim fəaliyyətimiz çox yüksək qiymətləndirilir. Biz də hər bir beynəlxalq yarışın təşkilində çalışırıq ki, onu ən yüksək səviyyədə keçirək. Bundan əlavə, deyə bilərəm ki, Azərbaycan dünyada, bəlkə də, yeganə bir ölkədir ki, Olimpiya oyunlarına hazırlıq mərhələsində burada idmanın üç növü üzrə lisenziya turnirləri keçiriləcəkdir. Azərbaycanda boks, taekvondo və voleybol üzrə beynəlxalq turnirlər keçiriləcəkdir ki, bu da öz növbəsində idmançılarımıza daha da gözəl şərait yaradacaqdır. Bilirsiniz ki, Azərbaycanda idman sürətlə, hərtərəfli inkişaf edir. İdmançılarımız beynəlxalq yarışlarda gözəl nəticələr göstərirlər. Azərbaycanda idmanın maddi-texniki bazası ən yüksək səviyyədə yenidən yaradılıbdır. Əlbəttə, beynəlxalq yarışların Azərbaycanda keçirilməsi ölkədə idmana böyük bir təkan verir, gənc, yeniyetmə idmançılarımız, uşaqlar bunu görüb həvəslənirlər. Əminəm ki, bu, həm də Azərbaycanda idmanın kütləviliyinə gətirib çıxaracaqdır. Əsas məqsədimiz də məhz budur. Yəni, uşaqlarımız idmanla məşğul olsunlar, öz fiziki sağlamlığını möhkəmləndirsinlər və Azərbaycanda gözəl, fiziki və mənəvi cəhətdən güclü nəsil yetişsin. SUAL: İlham müəllim, bugünkü idman bayramında 17 ölkədən nümayəndə heyəti iştirak edir. Beynəlxalq təşkilatların nümayəndələri də bu tədbirə qatılıblar. Belə bir idman yarışlarının Azərbaycanda keçirilməsini ölkəmizdəki ictimai-siyasi sabitliyin davamlı xarakter alması ilə də izah etmək olarmı? CAVAB: Şübhəsiz. Əgər Azərbaycanda ictimai-siyasi sabitlik olmasaydı, təbii ki, belə turnirlərin, yarışların keçirilməsi də qeyri-mümkün olacaqdı. Azərbaycanın ən böyük sərvəti ondadır ki, Heydər Əliyevin rəhbərliyi altında son on ildə ölkədə sabitlik, ictimai-siyasi asayiş hökm sürür. Bu, xalqımız, ictimaiyyətimiz üçün ən böyük sərvətdir, ən böyük qazancdır. Əlbəttə, belə bir rahat, sakit şəraitdə hər bir idman tədbirini, digər tədbirləri keçirmək mümkündür. Mən sizə deyə bilərəm ki, Beynəlxalq Gimnastika Federasiyasının nümayəndələri təxminən bir neçə ay bundan əvvəl təftiş məqsədi ilə Azərbaycana gəlmişdilər və burada bizim imkanlarımızı öyrənmiş, mövcud idman qurğuları ilə tanış olmuşdular. Onlar bizə böyük məmnuniyyət hissi ilə bildirmişdilər ki, Azərbaycanda nəinki idmanla məşğul olmaq üçün imkanlar, böyük beynəlxalq yarışlar keçirmək üçün gözəl idman qurğular var, eyni zamanda, ölkədə gözəl əhval-ruhiyyə, ab-hava hökm sürür. Bütün bu amillər ölkəmizdə belə yarışların keçirilməsinə imkan verir. Əminəm ki, gələcəkdə də Azərbaycanda neçə-neçə beynəlxalq yarışlar, çempionatlar keçiriləcəkdir. Bu da öz növbəsində bizim idmansevərlərimizi sevindirəcəkdir. SUAL: Siz indi ölkəmizdəki ictimai-siyasi vəziyyəti necə qiymətləndirirsiniz? Yəni narahatçılıq üçün hər hansı bir əsas varmı? CAVAB: Narahatçılıq üçün heç bir əsas yoxdur. İctimai-siyasi vəziyyət sabitdir. Hər şey qaydasındadır. Azərbaycan inkişaf edir, irəliyə gedir. Azərbaycan qarşıda qoyduğu bütün vəzifələri həyata keçirir . Əminəm ki, bundan sonra da belə olacaqdır. SUAL: İlham müəllim, respublika ictimaiyyəti Azərbaycan Prezidenti Heydər Əliyevin səhhəti ilə bağlı xəbərləri maraqla, ümidlə izləyir. Şükürlər olsun ki, Amerika Birləşmiş Ştatlarından nikbin xəbərlər alınır. Cənab Prezidentin səhhəti ilə bağlı son məlumat necədir? CAVAB: Mən deyə bilərəm ki, - ictimaiyyət də bunu bilir, - cənab Prezident ora çatandan sonra Klivlend klinikası dövlətimizin başçısının sağlamlığı ilə bağlı rəsmi məlumat vermişdi. O da mətbuata çatdırılmışdır. Eyni zamanda, deyə bilərəm ki, mən bu gün cənab Prezidentlə iki dəfə telefonla danışdım. Oranın vaxtı ilə dünən axşam saat on bir, bizdə səhər saat səkkiz idi. Bir də günorta, saat 4-də danışdım. Cənab Prezidentin səhhətində heç bir problem yoxdur. Özünü çox yaxşı, gümrah hiss edir. Əhval-ruhiyyəsi də yaxşıdır. O da bilirdi ki, bu gün Azərbaycanda belə bir mötəbər idman yarışı keçirilir. Xahiş etmişdi ki, mən onun salamlarını, ən xoş arzularını Azərbaycan xalqına çatdıram. Mən də bunu məmnuniyyətlə edirəm. Allaha şükürlər olsun ki, cənab Prezidentin müalicəsində çox müsbət dəyişikliklər vardır. Əminəm ki, yaxın gələcəkdə o, Vətənə dönəcəkdir. Çox sağ olun.