BAKIDA BRAYL ÇAP VƏ TƏDRİS MƏRKƏZİ AÇILMIŞDIR
AZƏRTAC-ın müxbiri xəbər verir ki, bu münasibətlə keçirilən mərasimdə təhsil naziri Misir Mərdanov yeni mərkəzin əhəmiyyətindən danışmışdır. Nazir demişdir ki, bu mərkəz kor və zəif görən uşaqlar üçün internat məktəbində təhsil alan 300 məktəblini Brayl əlifbası əsasında hazırlanmış xüsusi kitablar və digər tədris vəsaitləri ilə təchiz edəcək, uşaqların dərsliklərə ehtiyacını ödəyəcəkdir.
“Ümidli gələcək” Gənclər Təşkilatının sədri Nabil Seyidov bildirmişdir ki, Brayl Çap və Tədris Mərkəzinin açılmasında maliyyə vəsaitinin toplanması üçün təşkilat Təhsil Nazirliyi ilə birgə xeyriyyə konserti təşkil etmiş, bir çox yerli, xarici şirkət və qurumlara müraciət edərək lazımi maliyyə dəstəyi almışdır. Toplanmış maliyyə vəsaiti hesabına təşkilat İsveçdən mebel, kompüter avadanlığı almış və kor və zəif görən uşaqlar üçün internat məktəbinə hədiyyə etmişdir.
Sonda təhsil naziri Misir Mərdanov və “World Vizion” təşkilatının Azərbaycan üzrə prezidenti Maykl Mcintyre Brayl əlifbası əsasında hazırlanmış ilk kitaba ürək sözlərini yazmışlar.
Bölmənin digər xəbərləri
