BAKIDA “GƏNCLƏRİN İNSAN HÜQUQLARININ TƏDRİSİNDƏ ROLU” MÖVZUSUNDA BEYNƏLXALQ TƏLİM KURSU KEÇİRİLİR
Bakı, 4 iyun (AZƏRTAC). “Yeniliyə Doğru” Gənclər Fondu və Azərbaycan Könüllülər İctimai Birliyi Avropa Gənclər Siyasəti çərçivəsində Avropa Şurası Gənclər və İdman Direktoratlığı, Avropa Şurası Gənclər Fondunun dəstəyi ilə iyunun 3-dən “Gənclərin insan hüquqlarının tədrisində rolu” mövzusunda beynəlxalq təlimatçılar üçün kurs keçirir.
Təlim kursunda Belçika, İtaliya, Hollandiya, Polşa, Litva, Rumıniya, Ukrayna, Moldova, Rusiya, Gürcüstan, Türkiyə və Azərbaycandan gənc liderlər və gənclər təşkilatlarının nümayəndələri iştirak edirlər.
Layihənin əlaqələndiricisi Mahir Məmmədov, treninq keçən Günel Cəfərova bildirmişlər ki, təlim kursunun məqsədi insan haqlarının tədrisi ilə məşğul olan təlimçilərin, gənc liderlərin bacarıqlarını inkişaf etdirmək, Avropa Gənclər Siyasəti çərçivəsində gənclər və gənclər təşkilatlarının birgə fəaliyyətini və əməkdaşlığını genişləndirmək, gələcəkdə birgə layihələrin hazırlanması və artırılmasına təkan vermək, habelə gənclərin mədəniyyətlərarası, dinlərarası dialoqunu formalaşdırmaqdır.
Vurğulanmışdır ki, kurs müddətində iştirakçılar insan haqlarının tədrisi ilə bağlı müxtəlif metod və konsepsiyaların mövcud reallıqda və mədəni kontekstdə necə istifadə olunması və uyğunlaşdırılması ilə bağlı təlimatlanacaqlar.
Bundan əlavə, təlim kursu çərçivəsində iştirakçılar təmsil etdikləri ölkələrin mədəniyyətlərini, təşkilatlarını, tarixini, milli musiqilərini, adət-ənənələrini və milli yeməklərini də təqdim edəcəklər.
Bölmənin digər xəbərləri
