BAKIDA III ULUSLARARASI FOLKLOR KONFRANSI İŞƏ BAŞLAMIŞDIR
Akademiyanın Folklor İnstitutunun təşkilatçılığı ilə 30-a yaxın ölkə və vilayətdən gəlmiş tanınmış folklorşünasların iştirakı ilə 3 gün davam edəcək konfransı AMEA-nın prezidenti akademik Mahmud Kərimov açaraq, qonaqları salamlamış, tədbirin işinə uğurlar arzulamışdır. Natiq bildirmişdir ki, bu devizlə keçirilən uluslararası konfrans artıq üçüncü dəfədir ki, türk xalqlarının elmi elitasını təmsil edən alimləri, folklor mütəxəssislərini, tədqiqatçıları Bakıda bir araya gətirmişdir. Bu möhtəşəm tədbirdən məqsəd qloballaşan dünyada türk xalqlarının layiq olduqları yeri tutmasında, türk humanitar gerçəkliyinin mövqeyinin müəyyənləşdirilməsində yeni konseptual strategiyanın və proqramın işlənib hazırlanmasıdır. Tədbir həm də türk xalqları elmi təşkilatlarının inteqrasiyasına, elmi və mədəni məsələlərin həlli üçün ortaq bir məclisin yaradılmasına xidmət edir. AMEA-nın Folklor İnstitutu məhz belə bir təşəbbüsü gerçəkləşdirir.
Dünya xalqlarının milli, iqtisadi, dini, siyasi və mədəni inkişafını müəyyənləşdirən müxtəlif təşkilatların mövcudluğunu vurğulayan M.Kərimov diqqətə çatdırmışdır ki, bu təşkilarlar birlik üzvlərinin problemlərini aradan qaldırmaq üçün səyləri birləşdirir, bununla da, ayrı-ayrılıqda çətin məsələlərin həllini asanlaşdırır. Çağdaş dünya nə qədər humanist görünsə də, milli dəyərlərini mühafizə edə bilməyən millətlər istər-istəməz onun sərt üzü ilə qarşılaşmalı olur. Elmi və mədəni intellekt sahəsində geri qalmaq, çağdaşlıqla ayaqlaşmamaq milli inkişafın gələcəyi üçün müsbət proqnoz vermir.
Natiq demişdir ki, türk xalqlarının zəngin tarixi və mədəni keçmişi onları gələcəyə aparmalıdır. Bizim milli inkişafımız ortaq bir nöqtədən başlanmışdır və şübhə yoxdur ki, yenə də ortaq nöqtədə birləşəcəkdir. Dünyanın çağdaş gerçəkliyi də bunu həm zəruri edir, həm də millətlərin qarşısında vəzifə kimi qoyur.
Folklor İnstitutunun direktotu, filologiya elmləri doktoru, professor Hüseyn İsmayılov, türkiyəli alim, professor, doktor Erman Artun, AMEA-nın müxbir üzvü Tofiq Hacıyev, akademik Əhməd Süleymanov (Rusiya) konfransda toxunulacaq bir sıra vacib məsələlərdən, zaman-zaman parçalanmış, böyük türk xalqının mənəvi dəyərlərinin yenidən bərpasında, özünəqayıdışı yolunda AMEA-nın ardıçıl həyata keçirdiyi tədbirlərin əhəmiyyətindən danışmışlar. Qeyd olunmuşdur ki, son beş ildə Folklor İnstitutu türk xalqlarının mənəvi dəyərlərini özündə əks etdirən 100-dən artıq kitab nəşr etdirmişdir. “Dədə Qorqud” jurnalının bərpası da əhəmiyyətli hadisə kimi diqqətə çatdırılmışdır.
Açılış mərasimindən sonra konfrans işini AMEA-nın Folklor İnstitutunda, bölmə iclaslarında davam etdirmişdir.
Bölmənin digər xəbərləri
