BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 5 oktyabr (AZƏRTAC). Oktyabrın 4-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdı. Burada sakinlərə Sabirabad, Gədəbəy, Hacıqabul və digər rayonlardan gətirilmiş 10 tondan çox məhsul, o cümlədən 1 ton ət, 0,2 ton ağartı, 3,5 ton tərəvəz, 1,5 ton meyvə, 2 ton kartof, 2 min ədəd yumurta, 20 kiloqram bal təklif olunurdu. Alıcı Zeynəb Ağayevanın sözlərinə görə, yaxın ərazidə yaşadığından hər həftə buradan bazarlıq edir, çünki məhsulların qiyməti münasib, keyfiyyəti isə yüksəkdir.
Bakı Rabitə və Nəqliyyat Kollecinin həyətində təşkil olunan yarmarkada meyvə-tərəvəzin bolluğu ilk baxışdan diqqəti cəlb edirdi.
Kənd Təsərrüfatı Nazirliyinin nümayəndəsi Saleh Zərbəliyevin verdiyi məlumata görə, şənbə və bazar günləri burada Salyan, Quba, Qusar, Astara və Dəvəçi rayonlarından gətirilmiş 80,2 ton meyvə-tərəvəz satılmışdır.
Yaradılan əlverişli şəraitdən bəhrələnib ailə büdcələrinə xeyli qənaət etmək imkanı qazanan paytaxt sakinləri yarmarkada mövsümi meyvə və tərəvəz məhsullarının qiymətlərinin bazarlara nisbətən xeyli ucuz olmasından razılıq edirdilər.
Metronun “Əhmədli” stansiyasının yaxınlığında, “Azər” ticarət mərkəzindəki yarmarkada şəhər əhalisi satışa çıxarılan kənd təsərrüfatı məhsullarının bolluğundan razılıq edirdilər.
İşçi qrupunun qərargahından verilən məlumata görə, şənbə və bazar günləri bu yarmarkada 264,4 kənd təsərrüfatı məhsulları satılmışdır. Yarmarkaya Quba, Ağcabədi, Kürdəmir, Biləsuvar, Qax rayonlarından gətirilmiş məhsulların qiymətləri bazardakından 20-25 faiz ucuz olmuşdur.
Oktyabrın 4-5-də Suraxanı rayonu ərazisində təşkil olunmuş kənd təsərrüfatı məhsullarının satışı yarmarkalarında 72 ton 100 kiloqram məhsul satılmışdır.
Kənd Təsərrüfatı Nazirliyinin nümayəndəsi Mustafa Rüstəmov bildirmişdir ki, bunun 67 ton 300 kiloqramı “Günəş” ticarət mərkəzindəki yarmarkada, qalanı isə “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada satılmışdır. Hər iki yarmarkada məhsul bol, qiymətlər isə bazardakından 20-30 faizə qədər ucuz olmuşdur.
Biləcəri qəsəbəsi, Məlik Aslanov küçəsi, 284 nömrəli orta məktəbin yaxınlığındakı yarmarkada şənbə və bazar günləri 12 ton kənd təsərrüfatı məhsulları satılmışdır.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada isə alıcılara Goranboy, Bərdə və Ağstafadan gətirilmiş təzə və keyfiyyətli meyvə-tərəvəz, bostan məhsulları təklif olunmuşdur.
Nərimanov rayonunun Ə.Əliyev küçəsindəki yarmarkada iki gün ərzində Xaçmaz, Tərtər, İmişli, Tovuz, Astara, Oğuz və Qobustan rayonlarından gətirilmiş 43,1 ton məhsul satılmışdır.
Kənd Təsərrüfatı Nazirliyinin nümayəndəsi Fəxrəd Eminovun sözlərinə görə, satışa meyvə-tərəvəzlə yanaşı, Giləzi və Goradil broyler fabriklərinin nümayəndələri 10 mindən çox yumurta da çıxarılmışdır.
Yarmarkada mövsümi məhsullar üstünlük təşkil etmişdir.
######
Bölmənin digər xəbərləri
