Bakıda “Qonaqpərvərlik: hotel və restoranların idarə edilməsi” mövzusunda seminar keçirilmişdir
Bakı, 27 sentyabr (AZƏRTAC). Sentyabrın 27-də Bakıda “Kazbegi Azərbaycan” Məhdud Məsuliyyətli Cəmiyyətin dəstəyi, Hotellər və Restoranlar Assosiasiyasının təşkilatçılığı ilə Dünya Turizm Gününə həsr olunmuş “Qonaqpərvərlik: hotel və restoranların idarə edilməsi” mövzusunda seminar keçirilmişdir.
AZƏRTAC xəbər verir ki, Hotellər və Restoranlar Assosiasiyası idarə heyətinin sədri Samir Babazadə tədbir iştirakçılarına rəhbərlik etdiyi qurum barədə məlumat vermişdir. Bildirmişdir ki, assosiasiya hotellərin və restoranların idarə edilməsi, açılışa hazırlanması, personalın təlimi, daxili strukturun qurulması, böhrandan çıxma imkanları və digər sahələrdə xidmətlər göstərir. Bu xidmətlər yüksək peşəkarlıq səviyyəsində və hər bir müəssisəyə fərdi yanaşma əsasında qurulur. Bizim layihələr mehmanxanalarda xidmət səviyyəsinin artırılması və maliyyə dövriyyəsinin yüksəlməsinə yönəlmişdir.
Seminarda bildirilmişdir ki, Prezident İlham Əliyevin müvafiq Sərəncamı ilə 2011-ci ilin “Turizm ili” elan olunması və “Eurovision” müsabiqəsinin gələn il Bakıda keçirilməsi hotel və restoran şəbəkəsində fəaliyyət göstərənlərin üzərinə əlavə vəzifələr qoyur.
Seminarda Yunanıstanda fəaliyyət göstərən hotel və turizm sənayesi üçün kadrlar hazırlayan məktəbin işləri nümayış etdirilmişdir. Qeyd olunmuşdur ki, yarandığı 30 ildə məktəb dünyanın turizm sektoru üçün minlərlə kadr yetişdirmişdir.
Həmin məktəbin bu sahədə Azərbaycanın müvafiq sturukturları ilə əməkdaşlıq əlaqələri qurmaq üçün addımlar atdığı diqqətə çatdırılmışdır. Bildirilmişdir ki, bu məktəb tərəfindən yaxın vaxtlarda Bakıda menecerlərin peşəkarlığını artırmaq məqsədilə kurslar təşkil ediləcəkdir.
Sonra mehmanxanaların təsnifatı, xidmət standartları, təlim sistemi və s. ilə bağlı təqdimat olmuşdur. Təqdimatda menecerlər biliklərə yiyələnməklə yanaşı, hotelçilk və restoran biznesinin müasir ənənələri, xidmət standartlarının tətbiqi ilə bağlı suallara cavab tapmışlar.
Hotelin inzibati təsərrüfat fəaliyyətindən bəhs edən təqdimatda isə peşəkar təmizlik işlərinin standartları və onların əməli tətbiqi, camaşırxanaların istismarı kimi məsələlər tədbir iştirakçılarının diqqətinə çatdırılmışdır.
Seminar iştirakçıları gigiyena və qida təhlükəsizliyini də müzakirə etmişlər. Hotel və restoran aşpazları, masa xidmətçiləri, anbar işçiləri, sanitar həkimlər üçün nəzərdə tutulmuş təqdimatda gigiyena və qida məhsullarının saxlanma qaydaları şərh edilmişdir.
Seminarda, həmçinin hotel və restoran şəbəkəsində çalışan mütəxəssislərin praktiki bilik və bacarıqları nümayiş olunmuşdur.
Bölmənin digər xəbərləri
