MƏDƏNİYYƏT
Bakıda “Yeddi əmirlik bir istiqamət” adlı tədbir keçirilib VİDEO
Bakı, 11 sentyabr, Ceyhun Alışov, AZƏRTAC
Sentyabrın 11-də Bakıda Birləşmiş Ərəb Əmirliyinin bir sıra turizm idarə və şirkətlərinin iştirakı ilə turizmin inkişafı, ölkələr arasında bu sahədəki əməkdaşlığın artırılması və təbliği məqsədi ilə “Yeddi əmirlik bir istiqamət” adlı tədbir təşkil olunub.
AZƏRTAC xəbər verir ki, əsasən Birləşmiş Ərəb Əmirliyinin yerli və regional 30-dək turizm şirkətinin təmsil olunduğu tədbirdə bir sıra yerli və xarici turizm şirkətləri də iştirak edib. Tədbirin təşkil olunmasında əsas məqsəd Şarja Əmirliyinin turizm potensialının tanıdılması ilə yanaşı, ümumilikdə yeddi əmirliyin turizm sahəsindəki təcrübəsini bölüşməkdən ibarətdir.
Eyni zamanda, Şarja Əmirliyinin turizm sahəsinə daxil olan çarter hava reysləri, otel və mehmanxana sahəsindəki əməkdaşlıq tədbirin əsas mövzularından olub. Tədbirdə, həmçinin qeyd olunan əmirliyin ümumilikdə turizm imkanlarının nümayiş olunduğu videoçarx qonaqlara təqdim olunub. Birləşmiş Ərəb Əmirliyinin Turizm və Abidələr Milli Şurasının Kommunikasiyalar Departamentinin direktoru Xalid İbrahim ibn Nassar Azərbaycanla Birləşmiş Ərəb Əmirliyi arasında turizm sahəsındəki əməkdaşlıqdan söz açaraq bildirib ki, gələcəkdə bu sahədə daha da inkişaf və irəliləyişlərə nail olmaq üçün müvafiq addımlar atılır. Diqqətə çatdırılıb ki, iki tərəfdaş ölkə arasında qarşılıqlı turist axınını yüksək səviyyəyə çatdırmaqla yanaşı, aparıcı turizm şirkətlərinin mütəmadi əməkdaşlığının inkişafı da çox önəmlidir. İki ölkə arasında turizm sahəsindəki təcrübə mübadiləsinə toxunan qonaq bu sahədə əldə olunan son təcrübələrin birgə mənimsəniləcəyini qeyd edib. Bütün səylərin bu sahədəki inkişaf istiqamətinə yönəlməsini vurğulayan natiq qısa müddətdə böyük irəliləyişlərə nail olunacağına əminliyini ifadə edib.