BAKININ İŞĞALDAN AZAD EDİLMƏSİNİN 90-CI İLDÖNÜMÜ QEYD OLUNMUŞDUR
AZƏRTAC xəbər verir ki, sentyabrın 18-də Azərbaycan Dövlət Pedaqoji Universitetində (ADPU) Qafqaz İslam Ordusu və Azərbaycan qoşunları tərəfindən Bakının bolşevik-daşnak işğalından azad edilməsinin 90-cı ildönümü ilə bağlı tədbir keçirilmişdir.
Türkiyə Universitetləri Məzunları İctimai Birliyinin təşəbbüsü ilə keçirilən tədbirdə ADPU-nun prorektoru, professor Rafiq Baxşəliyev və başqaları Azərbaycan ilə Türkiyənin tarixi birliyindən bəhs etmişlər.
Natiqlər 1918-ci il sentyabrın 15-də Bakı şəhərində baş verən hadisələrdən danışaraq diqqətə çatdırmışlar ki, mənfur ermənilər işğalçılıq siyasəti apararaq ayrı-ayrı şəhər və rayonlarımızda qanlı faciələr törətmişlər. Bu faciəli hadisələrin qarşısını almaq üçün Azərbaycana qardaşlıq köməyinə gəlmiş Nuru Paşanın başçılıq etdiyi Qafqaz İslam Ordusu Bakını bolşevik-daşnak işğalından azad etmişdir.
Türkiyənin Azərbaycandakı səfirliyinin təhsil müşaviri Səlahəddin Dikmən Türkiyə ilə Azərbaycanın qardaşlıq münasibətlərinin əhəmiyyətini vurğulamışdır.
1918-ci ildə Bakıda bədnam düşmən qüvvələrinə qarşı döyüşlərdə Azərbaycan və türk əsgərlərinin fədakarlıqlarından, qəhrəmanlıqlarından bəhs edən natiq həmin tarixi hadisələrin heç zaman yaddan çıxmayacağını söyləmiş, gənclərə tövsiyələrini vermişdir.
Bölmənin digər xəbərləri
