BALAKƏNDƏ SOYQIRIMI QURBANLARININ XATİRƏSİ YAD EDİLMİŞDİR
Balakən, 30 mart (AZƏRTAC). Balakən rayonunda 31 mart - Azərbaycanlıların soyqırımı gününə həsr olunmuş anma mərasimi keçirilmişdir.
Tədbir iştirakçıları əvvəlcə Balakən şəhərində soyqırımı qurbanlarının xatirəsinə ucaldılmış abidə-kompleksin önünə gül-çiçək dəstələri düzmüşlər.
Rayon icra hakimiyyətinin akt zalında keçirilən toplantının əvvəlində soyqırımı qurbanlarının xatirəsi bir dəqiqəlik sükutla yad edilmişdir.
Tədbiri giriş sözü ilə açan icra hakimiyyətinin başçısı Asif Məmmədov ermənilərin xalqımızın başına gətirdikləri müsibətlərin, törətdikləri dəhşətli faciələrin, soyqırımı siyasətinin 200 ildən artıq tarixi olduğunu bildirmiş, həmin siyasət nəticəsində yüz minlərlə günahsız soydaşımızın qətlə yetirildiyini, bu təcavüzkar siyasətin indi də məqsədyönlü şəkildə davam etdirildiyini söyləmişdir.
Toplantıda rayon icra hakimiyyəti başçısının müavini Nəzakət Rüstəmova “Azərbaycanlıların soyqırımı” mövzusunda məruzə etmişdir.
Məruzə və çıxışlarda ermənilərin zaman-zaman xalqımıza qarşı törətdikləri kütləvi qırğınlar, terror aktları barədə ətraflı məlumat verilmiş, Ermənistanın bu gün də davam edən təcavüzkar siyasəti qətiyyətlə pislənilmişdir. Soyqırımı ilə bağlı həqiqətlərin dünya ictimaiyyətinə çatdırılmasında ümummilli liderimiz Heydər Əliyevin xidmətlərini vurğulayan natiqlər, hazırda bu siyasi xəttin Prezident İlham Əliyev tərəfindən uğurla davam etdirildiyini, Azərbaycanın ədalətli mövqeyinin artıq beynəlxalq təşkilatlar tərəfindən də dəstəkləndiyini xüsusi vurğulamışlar.
Bölmənin digər xəbərləri
