BALAKƏNDƏ XOCALI FACİƏSİ QURBANLARININ XATİRƏSİ ANILMIŞDIR
Balakən, 25 fevral (AZƏRTAC). Xocalı faciəsinin 17-ci ildönümü ilə bağlı Balakən rayonunda idarə və müəssisələrdə, ümumtəhsil məktəblərində, mədəniyyət ocaqlarında, qəsəbə və kəndlərdə soyqırımı qurbanlarının xatirəsinə həsr olunmuş anma mərasimləri, xatirə gecələri, inşa, şeir və rəsm müsabiqələri, idman yarışları keçirilir, sərgi və guşələr təşkil olunur.
Fevralın 25-də rayon rəhbərliyi və ictimaiyyət nümayəndələri Şəhidlər xiyabanına gələrək, burada uyuyan igid həmyerlilərinin əziz xatirəsini ehtiramla yad etmiş, məzarları üzərinə gül-çiçək düzmüşlər.
Sonra icra hakimiyyətinin məsul işçiləri şəhərdəki internat məktəbində məskunlaşmış 6 xocalı ailəsinin üzvləri ilə görüşmüş, onların qayğı və problemləri ilə maraqlanmışlar.
Xocalı sakinləri məcburi köçkünlərin sosial problemlərinin həllinə göstərdiyi diqqət və qayğıya görə Prezident İlham Əliyevə minnətdarlıq etmiş, dövlət başçısının məqsədyönlü siyasəti və qətiyyətli addımları nəticəsində tezliklə öz doğma yurd-yuvalarına qayıdacaqlarına əminliyini bildirmişlər.
Görüşün sonunda rayonda məskunlaşmış Xocalıdan olan 6 ailəyə maddi yardım göstərilmişdir.
Bölmənin digər xəbərləri
