Banqladeşdə ötən sutka COVID-19-a 4 minə yaxın yoluxma qeydə alınıb
Pekin, 25 iyun, AZƏRTAC
Banqladeşdə ötən sutka ərzində yeni növ koronavirusa (COVID-19) 3946 yoluxma və virus səbəbindən 39 ölüm qeydə alınıb.
AZƏRTAC Banqladeşin Səhiyyə Xidmətləri üzrə Baş İdarəsinə istinadla xəbər verir ki, ölkədə virusa yoluxanların ümumi sayı 126 min 606 nəfərə, ölənlərin sayı isə 1621-ə çatıb.
İdarənin direktoru Nəsimə Sultana deyib ki, indiyədək virusa yoluxanların təxminən 40 faizi sağalıb, 1,28 faizi isə ölüb. Pasiyentlərin təxminən 75 faizi evdə müalicə alır.
Hökumət virusa yoluxanlarla yaxın təmasda olanların təcrid edilməsi üçün tibb müəssisələri və təhsil ocaqları ilə yanaşı, idman və sərgi komplekslərindən də istifadə edir. İndiyədək 349 mindən çox adam xüsusi yerlərdə və ya evlərdə karantinə cəlb olunub ki, onların 285 mini karantin dövrünü başa vurub. Xaricdən virus axınının qarşısını azaltmaq üçün hava və dəniz limanlarında, sərhəd-keçid məntəqələrində karantin tədbirləri gücləndirilib.
Xatırladaq ki, Banqladeşdə COVID-19 infeksiyasına ilk yoluxma martın 8-də qeydə alınıb. Ölkədə ən çox yoluxma paytaxt Dəkkə, Çattoqram və Narayanqanc şəhərlərində qeydə alınıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
