BDU-da Birinci Türkoloji Qurultayın 100 illiyi silsilə tədbirlərlə qeyd olunub
Bakı, 6 iyul, AZƏRTAC
Prezident İlham Əliyevin “Birinci Türkoloji Qurultayın 100 illik yubileyinin keçirilməsi haqqında” 2025-ci il 22 oktyabr tarixli Sərəncamı bu möhtəşəm elmi hadisənin yalnız tarixi əhəmiyyətini deyil, həm də müasir dövrdə Türk dünyasının inteqrasiyası baxımından daşıdığı strateji mahiyyəti, gələcəyin inkişaf strategiyasını müəyyənləşdirən elmi-mədəni irs olduğunu bir daha təsdiq edir.
Ölkəmizdə türkologiya elminin əsas mərkəzlərindən biri olan Bakı Dövlət Universiteti (BDU) də qurultayın elmi-mədəni irsinə yenidən nəzər salmaq məqsədilə ilboyu silsilə tədbirlər – konfranslar, elmi müzakirələr, sərgilər, görüşlər təşkil edib.
Bu barədə AZƏRTAC-a BDU-dan məlumat verilib. Qeyd olunub ki, Qazaxıstanın Almatı şəhərində BDU, Türk Akademiyası, Əl-Fərabi adına Qazax Milli Universiteti, Türk Dil Qurumu və Türk Mədəniyyəti və İrsi Fondunun birgə təşkilatçılığı ilə “Birinci Bakı Türkoloji Qurultayının irsi: Türk dünyasının inteqrasiyasında türkologiyanın rolu” mövzusunda beynəlxalq simpozium keçirilib. Simpoziumda BDU-nun Ümumi dilçilik kafedrasının müdiri akademik Nizami Cəfərov “Birinci Türkoloji Qurultayda Azərbaycan türkləri”, Türkologiya kafedrasının müdiri, professor Məhərrəm Məmmədov “Birinci Bakı Türkoloji Qurultayında türkologiyanın inkişaf istiqamətləri”, Asiya və Afrika ölkələri tarixi kafedrasının müdiri dosent İqbal Ağayev “Türk mirası kontekstində Şuşanın musiqi dünyası: tarixi yaddaşdan ortaq gələcəyə” və BDU-nun Mədəni İrsi Araşdırma Mərkəzinin direktoru Musa Mərcanlı “Türk dünyası: ortaq mədəni irsinin qorunması və təbliği məsələləri” mövzusunda məruzələrlə çıxış ediblər.
Bakıda və Qarabağda keçirilən “Türk Dünyası Həftəsi”ndə BDU əsas tərəfdaşlardan biri olub.
BDU, Mədəniyyət Nazirliyi, TÜRKSOY, Beynəlxalq Türk Akademiyası, Türk Mədəniyyəti və İrsi Fondu, Əl-Fərabi adına Qazax Milli Universiteti və Türk Dil Qurumunun birgə təşkilatçılığı ilə “Türk dilləri, ədəbiyyatları və tarixlərinin tədrisi müasir çağırışlar kontekstində” mövzusunda beynəlxalq elmi konfrans keçirilib. Konfransın açılışında BDU-nun rektoru Elçin Babayev, mədəniyyət nazirinin müavini Səadət Yusifova, AMEA-nın prezidenti İsa Həbibbəyli, Beynəlxalq Türk Akademiyasının prezidenti Şahin Mustafayev, Türk Mədəniyyəti və İrsi Fondunun prezidenti Aktotı Raimkulova, Əl-Fərabi adına Qazax Milli Universitetinin rektoru Janseyit Tuymebayev, Türkiyə Elmlər Akademiyasının prezidenti Müzəffər Şəkər, Türkiyənin UNESCO üzrə Milli Komissiyasının sədri Mehmet Öcal Oğuz çıxış ediblər. Beynəlxalq konfrans “Birinci Türkoloji Qurultayın mirası: Türk xalqlarının mədəni-elmi inteqrasiyası” mövzusunda panel sessiyası ilə işini davam etdirib.
Konfrans “Birinci Türkoloji Qurultayın elmi-mədəni irsi: tədqiqi və tədrisi”, “Birinci Türkoloji Qurultayda dil quruculuğu: öyrənilməsi və tədrisi”, “Türk xalqlarının mədəniyyəti, tarixi və onların tədrisi məsələləri” bölmə iclaslarından ibarət olub. Panel sessiyada və bölmə iclaslarında Azərbaycan, Türkiyə, Qazaxıstan, Özbəkistan, Qırğızıstan və Şimali Kipr Türk Respublikasından olan tədqiqatçıların 60-a yaxın məruzəsi dinlənilib.
Silsilə tədbirlər çərçivəsində BDU-nun nəşr etdiyi “Birinci Türkoloji Qurultayın dərsləri” kitabının da təqdimat keçirilib. BDU-da, həmçinin Beynəlxalq Türk Akademiyasının çap etdirdiyi “100 ilin ardından Bakı Türkoloji Qurultayı” və “Birinci Bakı Türkoloji Qurultayı: 1926-cı il sənədlər işığında” kitablarının sərgisi və təqdimat mərasimi təşkil edilib.
Azərbaycan Milli Kitabxanasında isə BDU və Milli Kitabxananın birgə hazırladığı “Birinci Türkoloji Qurultay: Stenoqrafik hesabat (26 fevral – 6 mart 1926-ci il)” kitabı təqdim olunub.
Bundan əlavə, ilboyu BDU-da Birinci Türkoloji Qurultayın elmi-mədəni irsinin tədqiqi və təbliği istiqamətində silsilə elmi seminarlar, dəyirmi masalar, görüşlər, mühazirələr təşkil edilib. Xatırladaq ki, fevral ayında “BDU könüllüləri” təşkilatçılığı ilə Birinci Türkoloji Qurultayın 100 illik yubileyinə həsr olunmuş simulyasiya konfransı keçirilib.
Bölmənin digər xəbərləri
