BDU-da “Qərbi Azərbaycan: Tarixin izi ilə” layihəsi çərçivəsində infosessiya keçirilib
Bakı, 22 oktyabr, AZƏRTAC
Bakı Dövlət Universiteti (BDU), Qərbi Azərbaycan İcması (QAİ) və “Regional İnkişaf” İctimai Birliyinin (RİİB) birgə təşkilatçılığı ilə “Qərbi Azərbaycan: Tarixin izi ilə” layihəsi çərçivəsində məlumatlandırıcı infosessiya keçirilib.
AZƏRTAC xəbər verir ki, əvvəlcə Dövlət Himnimiz səsləndirilib, ərazi bütövlümüz və suverenliyimiz naminə canından keçən qəhrəmanların əziz xatirəsi bir dəqiqəlik sükutla yad edilib.
Tədbiri giriş sözü ilə açan BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev belə görüşlərin gənclərdə vətənpərvərlik hisslərinin möhkəmlənməsində, tarixə marağın artırılmasında mühüm əhəmiyyət daşıdığını vurğulayıb.
Prorektor bildirib ki, Müzəffər Ali Baş Komandan Prezident İlham Əliyevin rəhbərliyi ilə əldə olunmuş Zəfər xalqımızın milli iradəsinin və birliyinin təntənəsidir: “Vətən müharibəsində qazanılmış Qələbədən sonra ölkəmiz təkcə döyüş meydanında deyil, həm də quruculuq sahəsində mühüm nailiyyətlər əldə edib. İşğaldan azad olunmuş ərazilərdə məktəblər, mədəniyyət ocaqları, yollar inşa edilir, müxtəlif tədbirlər və festivallar keçirilir. Bütün bunlar dövlətimizin gücünü və xalqımızın birliyini nümayiş etdirir”.
Əliş Ağamirzəyev qeyd edib ki, tariximizin mühüm səhifələrindən biri olan Qərbi Azərbaycan məsələsi də daim diqqət mərkəzində saxlanılmalıdır: “Bu torpaqlar bizim tarixi yurd yerlərimizdir. Əsrlər boyu soydaşlarımız oradan zorla deportasiya olunublar. Bu həqiqətlərin dünyaya çatdırılması və gənclər arasında təbliği milli yaddaşımızın qorunması baxımından mühüm əhəmiyyət kəsb edir. Bu məqsədlə BDU-da Qərbi Azərbaycan Araşdırmaları Mərkəzi yaradılıb və aktiv fəaliyyət göstərir”.
Milli Məclisin Gənclər və İdman Komitəsinin, Qərbi Azərbaycan İcmasının Gənclər Şurasının sədri Şahin İsmayılov çıxışında tarixi yaddaşın qorunması və Qərbi Azərbaycan həqiqətlərinin təbliği istiqamətində gənclərin üzərinə düşən vəzifələrdən bəhs edib: “Gənclərin ən əsas vəzifəsi yaxşı təhsil almaqdır. Dövlətin inkişafı savadlı, vətənpərvər gənclərdən asılıdır. Hər bir gəncin ideyası yeni bir çağırış, yeni bir fikirdir”.
Layihənin rəhbəri, RİİB-in əməkdaşı, Vətən müharibəsi iştirakçısı və Hərbi Qənimətlər Parkının meneceri Orucəli Abbaszadə Qərbi Azərbaycandan olan soydaşlarımızın doğma torpaqlarından zorla köçürülməsinin xalqımızın yaddaşında silinməz izlər buraxdığını diqqətə çatdırıb. O, bu kimi layihələrin gənclərin maarifləndirilməsinə, tarixi ədalətin bərpası istiqamətində ictimai şüurun formalaşmasına xidmət etdiyini vurğulayıb.
Qərbi Azərbaycan İcması İdarə Heyətinin üzvü, Azərbaycan Dövlət Pedaqoji Universitetinin Elmi-təşkilati şöbəsinin müdiri İbrahim Bayramov Qərbi Azərbaycana Qayıdış Konsepsiyası barədə ətraflı məlumat verib, mövzunun aktuallığını və sosial-tarixi əhəmiyyətini iştirakçıların diqqətinə çatdırıb.
BDU-nun Tarix fakültəsinin Mənbəşünaslıq, tarixşünaslıq və metodika kafedrasının dosenti Aydın Məmmədov Qərbi Azərbaycanın tarixi və etnoqrafiyası haqqında məruzə ilə çıxış edib.
Tədbir çərçivəsində Qərbi Azərbaycan İcmasının əməkdaşı İlahə Cəfərova tərəfindən hazırlanan təqdimat nümayiş etdirilib.
İnfosessiya sual-cavab formatında davam edib. İştirakçılar Qərbi Azərbaycanla bağlı tarixi faktlar, hüquqi məsələlər və gələcək planlar barədə fikir mübadiləsi aparıb, onları maraqlandıran suallara cavab alıblar.
Bölmənin digər xəbərləri
