Bədnam ermənilərin törətdikləri soyqırımı cinayətləri beynəlxalq hüquq normalarına meydan oxumaqdır
Bakı, 31 mart (AZƏRTAC, İbrahim Əsədov). Martın 31-də Bakı Dövlət Universitetində (BDU) 96 il bundan əvvəl ermənilərin Bakıda və Azərbaycanın digər bölgələrində törətdikləri soyqırımının qurbanlarının xatirəsi anılmışdır.
AZƏRTAC xəbər verir ki, professor və müəllimlərin, tələbələrin iştirak etdikləri tədbirdə BDU-nun rektoru, Milli Məclisin deputatı, akademik Abel Məhərrəmov bədnam ermənilərin zaman-zaman Azərbaycana qarşı qəsbkarlıq siyasəti apardıqlarını, torpaqlarımızda günahsız qanlar axıtdıqlarını xatırlatmış, məkrli düşmənin öz çirkin məqsədlərindən dönmədiyini diqqətə çatdırmışdır.
Erməni daşnaklarının 1918-ci ilin martında Bakıda, Lənkəranda, Qubada, Şamaxıda və digər şəhər və rayonlarımızda törətdikləri dəhşətli qırğınlardan danışan rektor qeyd etmişdir ki, bu hadisələr zamanı 50 mindən çox insan amansızcasına qanına qəltan edilmiş, kəndlər, şəhərlər viran olunmuşdur.
Akademik A. Məhərrəmov dahi rəhbər Heydər Əliyevin təşəbbüsü ilə 1918-ci il 31 mart hadisələrinə siyasi-hüquqi qiymət verildiyini xatırlatmışdır. Qeyd edilmişdir ki, qanlı faciə qan yaddaşımızdan heç zaman silinməyəcəkdir.
Ermənistan-Azərbaycan, Dağlıq Qarabağ münaqişəsinə toxunan akademik A. Məhərrəmov düşmən tərəfindən zəbt olunmuş ərazilərimizin Azərbaycan Prezidenti İlham Əliyevin apardığı siyasət nəticəsində tezliklə işğaldan azad ediləcəyinə inamını vurğulamışdır.
Azərbaycan Respublikasının insan hüquqları üzrə müvəkkili (Ombudsman) Elmira Süleymanova mənfur ermənilərin törətdikləri soyqırımı cinayətlərini beynəlxalq hüquq normalarına meydan oxumaq kimi qiymətləndirmişdir.
Ermənistan-Azərbaycan, Dağlıq Qarabağ münaqişəsindən bəhs edən E. Süleymanova BMT-nin Təhlükəsizlik Şurasının münaqişənin beynəlxalq hüquq normaları əsasında həlli ilə bağlı məlum 4 qətnaməsini xatırlatmışdır. Bildirmişdir ki, həmin qətnamələrdə Dağlıq Qarabağ münaqişəsinin sülh yolu ilə həll edilməsi, regionda sülhə təhlükə yaradan bütün hərbi əməliyyatların dayandırılması, atəşkəsin təmin olunması, bütün işğalçı erməni qüvvələrinin Azərbaycan ərazilərindən heç bir şərt irəli sürmədən çıxarılması tələb olunur. Bu cür sənədlər Avropa Şurası, ATƏT və digər beynəlxalq təşkilatlar tərəfindən də qəbul edilmişdir. Lakin Ermənistan beynəlxalq konvensiyaların müddəalarını, o cümlədən BMT-nin Nizamnaməsini nəzərə almadan onları yerinə yetirmir. Bədnam düşmən bəşəriyyət üçün təhlükəli olan işğalçılıq siyasətini bu gün də davam etdirir.
Ermənistanın işğalçılıq planlarının qarşısının qətiyyətlə alınması sahəsində ulu öndər Heydər Əliyevin və Azərbaycan Prezidenti İlham Əliyevin siyasətinin əhəmiyyətini vurğulayan E. Süleymanova, eyni zamanda, tələbə və gəncləri vətənpərvərliyə çağırmışdır.
Qeyd olunmuşdur ki, ermənilərin xalqımıza qarşı törətdikləri soyqırımları barədə dünya ictimaiyyətinə daha ətraflı məlumatlar verilməlidir.
Milli Məclisin deputatı, professor Musa Qasımlı məkrli ermənilərin soyqırımı siyasəti apardıqlarını arxiv sənədləri əsasında, konkret faktlarla diqqətə çatdırmışdır.
Bölmənin digər xəbərləri
