Bərdə taxılçıları bu günədək 3185 ton məhsul tədarük ediblər
Bərdə, 8 iyun, AZƏRTAC
Bir neçə gündür ki, Bərdə rayonunun fermerləri və torpaq mülkiyyətçiləri arpa biçininə başlayıblar. Biçinin vaxtında və itkisiz başa çatdırılması üçün bütün qüvvələr səfərbər olunub.
Bərdə Rayon Statistika İdarəsinin rəisi Əlövsət Məmmədov AZƏRTAC-ın bölgə müxbirinə bildirib ki, torpaq mülkiyyətçiləri bu il 11038 hektar sahədə taxıl becəriblər. Onun da 8511 hektarı buğda, 2527 hektarı dən üçün arpadır. Düzgün aqrotexniki qulluq sayəsində zəmilərdə bol məhsul yetişib.
Havaların əlverişli keçməsindən istifadə edən taxılçılar artıq 812 hektar sahədə biçin aparıblar. Zəmilərdən 3185 ton məhsul əldə edilib. Hər hektarın orta məhsuldarlığı 39,2 sentnerdir.
Qeyd edək ki, Bərdə taxılçıları keçən il 11 min 642 hektar taxıl sahəsindən 50 min 170 ton məhsul, o cümlədən 40 min 52 ton buğda, 10 min 118 ton arpa əldə ediblər. Hər hektarın məhsuldarlığı orta hesabla buğda sahələrində 44,3 sentner, arpa sahələrində isə 38,9 sentner olub.
Bölmənin digər xəbərləri
