BERTİ FOQTS: BEYNƏLXALQ FUTBOLDA ZƏİF RƏQİBLƏR OLMUR
Bakı, 5 iyun (AZƏRTAC). AFFA-da futbol üzrə Azərbaycan yığmasının baş məşqçisi Berti Foqtsın iyunun 6-da Tofiq Bəhramov adına respublika stadionunda 2010-cu ilin dünya çempionatının seçmə turu çərçivəsində Azərbaycan və Uels milli komandaları arasında keçiriləcək matça həsr edilmiş mətbuat konfransı olmuşdur.
B.Foqts demişdir: “Bu oyuna hazırlıq Türkiyə ilə matçdan başlanmışdır. Rəşad Sadıxov meydandan kənarlaşdırılanadək komanda yaxşı oynayırdı. Oyunçularım Uelslə görüşə yaxşı hazırlaşmışlar. Əgər onlar məşqlərdəki oyunu nümayiş etdirsələr, 100 faiz əminəm ki, udacaqlar”.
Onun sözlərinə görə, Uelsin tərkibində qələbə üçün var gücünü əsirgəməyəcək gənc oyunçuların sayı çoxdur.
Almaniya mütəxəssisi bildirmişdir ki, Uelslə matç asan olmayacaqdır. Özü də onlar rəqib meydanlarda çox yaxşı təəssürat bağışlayırlar. Futbolçuların əksəriyyəti İngiltərənin Premyer-liqasında oynayır, gündə 4-5 saat məşq edirlər.
Berti Foqts yetirmələrinin yaxşı fiziki formada olduğunu vurğulayaraq demişdir: “Uels yığması çox təhlükəli, ciddi rəqibdir. Biz onların son matçlarını izləmişik, çox sürətlə oynayırlar. Ən başlıcası isə odur ki, beynəlxalq futbolda zəif rəqiblər olmur”.
Bölmənin digər xəbərləri
