Beynəlxalq Universitet İdmanı Federasiyası “Yekaterinburq-2023”ə hazırlığı qiymətləndirib
Bakı, 24 sentyabr, AZƏRTAC
Beynəlxalq Universitet İdmanı Federasiyasının (FISU) texniki komitəsindən ibarət nümayəndə heyəti Yekaterinburqun “Universiada-2023”ə hazırlığını qiymətləndirmək üçün şəhərə səfər edib.
AZƏRTAC xəbər verir ki, bu barədə yarışın mətbuat xidməti məlumat yayıb. Səfər çərçivəsində FISU-nun baş katibi Erik Seyntronun rəhbərlik etdiyi nümayəndə heyəti yarışın təşkilatçıları ilə yanaşı, şəhər və rayon rəhbərliyi ilə bir sıra görüşlər keçirib. Görüşlər zamanı obyektlərin hazırlanması, idmançıların və qonaqların yerləşdirilməsi məsələləri, həmçinin bədii proqram müzakirə edilib.
Səfərdən sonra nümayəndə heyəti təşkilati işin bütün aspektləri haqqında hesabat və hazırlıq prosesinin optimallaşdırılması üçün tövsiyələr verəcək.
XXXII Ümumdünya Yay Universiadası 2023-cü il avqustun 8-dən 19-dək Yekaterinburqda keçiriləcək. Proqrama 18 idman növü üzrə yarışlar daxil edilib.
Qeyd edək ki, növbəti - XXXI Ümumdünya Yay Universiadası 2021-ci ildə Çinin Çendu şəhərində təşkil olunması planlaşdırılsa da, pandemiya səbəbindən 2022-ci ilə təxirə salınıb.
İtaliyanın Neapol şəhərində keçirilən XXX Yay Universiadasında Azərbaycan milli komandası 2 qızıl, 3 gümüş və 2 bürünc medal qazanaraq komanda hesabında 18-ci yerdə qərarlaşıb.
Bölmənin digər xəbərləri
