Bəzi bitki növlərinin yarpaq quruluşundakı anatomik fərqlər öyrənilib
Bakı, 7 yanvar, AZƏRTAC
Botanika İnstitutunun direktoru professor Səyyarə İbadullayevanın həmmüəllifi olduğu “Dəyişən iqlim şəraitində yarpaq anatomiyasının histoloji eninə kəsilməsi kontekstində Sterculiaceae fəsiləsinin sistematikası” adlı elmi məqalə “Annals of Applied Biology” jurnalında (WOS, Scopus, Q2) çap olunub.
İnstitutdan AZƏRTAC-a bildirilib ki, məqalə Pakistan, Səudiyyə Ərəbistanı, Azərbaycan və Albaniyanın aparıcı elmi qurumlarını təmsil edən alimlərin birgə əməkdaşlığı nəticəsində hazırlanıb.
Tədqiqat Sterculiaceae fəsiləsinə aid bəzi bitki növlərinin yarpaq quruluşundakı anatomik fərqlərin öyrənilməsinə həsr edilib. Nəticələr göstərib ki, bu fəsiləyə aid növlər arasında, xüsusilə yarpaq səthinin quruluşu baxımından əhəmiyyətli fərqlər mövcuddur. Statistik analizlər növlər arasındakı anatomik fərqlərin elmi əsaslarla qruplaşdırılmasına imkan verib. Əldə olunan nəticələr bitki sistematikası, taksonomiya, anatomiya və iqlim dəyişiklikləri şəraitində bitkilərin uyğunlaşma mexanizmlərinin öyrənilməsi baxımından mühüm elmi əhəmiyyət daşıyır.
Bölmənin digər xəbərləri
