Birləşmiş Ştatların regionla bağlı siyasətində Azərbaycan xüsusi yer tutur - ŞƏRH
Bakı, 12 fevral, AZƏRTAC
Cənubi Qafqaz regionu geosiyasi mövqeyi, enerji resursları və nəqliyyat imkanları baxımından beynəlxalq aktorların diqqət mərkəzində qalmaqda davam edir. ABŞ-ın region siyasətində Azərbaycan xüsusi yer tutur. Bu, ilk növbədə Azərbaycanın strateji coğrafi mövqeyi, zəngin enerji ehtiyatları, həmçinin regional sabitlik və əməkdaşlıq proseslərində oynadığı rol ilə bağlıdır.
Bunu AZƏRTAC-a açıqlamasında Kocaeli Heydər Əliyev mədəniyyət mərkəzinin sədri, siyasi ekspert Bilal Dündar bildirib.
Onun sözlərinə görə, Azərbaycan ABŞ üçün Cənubi Qafqazda etibarlı tərəfdaşlardan biri hesab olunur.
“Müstəqilliyin ilk illərindən etibarən iki ölkə arasında siyasi dialoq, iqtisadi əməkdaşlıq və təhlükəsizlik sahəsində münasibətlər ardıcıl inkişaf edib. Vaşinqton regionda sabitliyin qorunması, enerji təhlükəsizliyinin təmin olunması və yeni nəqliyyat marşrutlarının formalaşması baxımından Azərbaycanla əməkdaşlığa mühüm önəm verir. Enerji faktoru Azərbaycan-ABŞ münasibətlərində əsas istiqamətlərdən biridir. Xəzər hövzəsinin enerji resurslarının dünya bazarlarına çıxarılması məqsədilə həyata keçirilən Bakı-Tbilisi-Ceyhan əsas ixrac neft kəməri, eləcə də Cənub Qaz Dəhlizi kimi irimiqyaslı layihələr ABŞ tərəfindən daim dəstəklənib. Bu layihələr Avropanın enerji mənbələrinin şaxələndirilməsi və qlobal enerji təhlükəsizliyinin möhkəmləndirilməsi baxımından strateji əhəmiyyət daşıyır. Bununla yanaşı, Azərbaycanın tranzit ölkə kimi rolu da ABŞ-ın iqtisadi maraqları sırasında mühüm yer tutur. Şərqlə qərbi birləşdirən nəqliyyat dəhlizlərinin, xüsusilə Trans-Xəzər Beynəlxalq Nəqliyyat Marşrutunun inkişafı qlobal ticarətin alternativ istiqamətlər üzrə genişlənməsinə şərait yaradır. Azərbaycanın müasir liman infrastrukturu, dəmir yolu şəbəkəsi və logistika imkanları bu prosesdə ölkənin rolunu daha da gücləndirir”, - deyə B.Dündar vurğulayıb.
Ekspert bildirib ki, ABŞ şirkətləri uzun illərdir Azərbaycanın enerji sektorunda aktiv iştirak edir. Son dövrlərdə isə əməkdaşlıq qeyri-neft sahələrinə – bərpaolunan enerji, informasiya texnologiyaları, kənd təsərrüfatı, logistika və xidmət sektorlarına doğru genişlənməkdədir: “Azərbaycanın iqtisadiyyatın şaxələndirilməsi strategiyası xarici investisiyalar, o cümlədən ABŞ kapitalı üçün yeni imkanlar yaradır. Siyasi və təhlükəsizlik sahəsində əməkdaşlıq da münasibətlərin mühüm istiqamətlərindəndir. Terrorizmlə mübarizə, regional sabitliyin qorunması, humanitar və təhsil proqramları çərçivəsində tərəflər arasında qarşılıqlı fəaliyyət davam edir. Bu əməkdaşlıq regionda etimad mühitinin formalaşmasına və uzunmüddətli sabitliyə töhfə verir. Ümumilikdə, Azərbaycan ABŞ-ın Cənubi Qafqaz siyasətində həm enerji tərəfdaşı, həm strateji tranzit ölkə, həm də regional sabitlik aktoru kimi çıxış edir. Mövcud əməkdaşlıq potensialı gələcəkdə enerji keçidi, rəqəmsal iqtisadiyyat, yaşıl texnologiyalar və nəqliyyat-logistika sahələrində Azərbaycan-ABŞ münasibətlərinin daha da dərinləşməsi üçün geniş imkanların mövcud olduğunu göstərir”.
Bölmənin digər xəbərləri
