Bakı, 1 fevral, AZƏRTAC

Qırğız Respublikasının paytaxtı Bişkekdə “Ulu Öndər Heydər Əliyevin irsinə həsr olunmuş kitabların nəşri” beynəlxalq layihəsi çərçivəsində rus dilinə tərcümə olunaraq işıq üzü görmüş “Heydər Əliyevin həyatının 100 anı” kitabının təqdimat mərasimi keçirilib.

AZƏRTAC xəbər verir ki, əvvəlcə Qırğızıstandakı “Mərkəzi Asiyada Mütərəqqi Azərbaycanlılar Birliyi” İctimai Birliyinin sədri Xansuvar Baxşəliyev, “Qırğızıstan-Azərbaycan” Dostluq və Əməkdaşlıq Birliyinin sədri, Qırğız Respublikasının Əməkdar həkimi Akif Alaferdov, “Azərbaycanım” beynəlxalq jurnalının baş redaktoru, Beynəlxalq Elmlər Akademiyasının müxbir üzvü Emil Nəsirli və digər qonaqlar Ulu Öndərin Bişkekdə fəaliyyət göstərən Heydər Əliyev adına 20 nömrəli Məktəb-Gimnaziya Kompleksindəki büstü önünə əklil və gül dəstələri qoyub, onun unudulmaz xatirəsini ehtiramla yad ediblər.

Məktəb-gimnaziyanın rəhbərliyi və şagirdlər Türk dünyasının görkəmli xadimi Heydər Əliyevin büstü, onun adını daşıyan otaq, həyatını və fəaliyyətini əks etdirən stend, məktəbin açılış mərasimində Azərbaycan və Qırğızıstan prezidentlərinin iştirakı, dövlətimizin başçısının Bişkekə səfərini əks etdirən “Qırğızıstan-Azərbaycan Dostluğu” stendi və təhsil-tərbiyə kompleksinin fəaliyyəti barədə ətraflı məlumat verib. Sonra Heydər Əliyev adına 20 nömrəli Məktəb-Gimnaziya Kompleksinin kollektivi qonaqlar qarşısında xüsusi proqramla çıxış edib.

Tədbirdə Emil Nəsirli Qırğızıstanda yaşayan yeni nəsil azərbaycanlıların doğma dilimizi öyrənməsinin, valideynlərin də Azərbaycan dili dərslərində iştirakının önəmini diqqətə çatdırıb və məktəblilərin dərslər barədə fikri ilə maraqlanıb, məktəb-gimnaziyanın müəllim və şagirdlərinin Azərbaycan xalqının dahi oğlu, qüdrətli dövlət xadimi və müdrik siyasətçi, müstəqil Azərbaycanın memarı Heydər Əliyevin həyat və fəaliyyətindən bəhs edən suallarını cavablandırıb.

Sonra tədbir iştirakçıları Qırğızıstandakı “Birlik” Azərbaycanlıların İctimai Birliyinin təşkilatçılığı ilə təşkil edilmiş Qırğızıstan-Azərbaycan Dostluq Parkında iynəyarpaqlı ağacların əkilməsi aksiyasında iştirak ediblər.

Daha sonra A.Osmonov adına Qırğızıstanın Milli Kitabxanasında təşkil edilən rus dilinə tərcümə edilərək işıq üzü görmüş “Heydər Əliyevin həyatının 100 anı” kitabının təqdimatı olub.

Qırğız Respublikasının Azərbaycandakı səfiri Kayrat Osmonaliyevin, “Birlik” Azərbaycanlıların İctimai Birliyinin təşkilati dəstəyi və kitabın müəllifi Emil Nəsirlinin təşəbbüsü ilə təşkil olunan tədbirdə Ulu Öndər Heydər Əliyevin və Azərbaycanın ərazi bütövlüyü uğrunda mübarizədə canlarını qurban vermiş şəhidlərin əziz xatirəsi bir dəqiqəlik sükutla yad edilib.

Əvvəlcə “Azərbaycanın dostları klubu”nun prezidenti, tədbirin moderatoru Assol Moldokmatova çıxış edərək sözü Qırğızıstanın Azərbaycandakı səfiri Kayrat Osmonaliyevə verib.

Səfir Kayrat Osmonaliyev Ümummilli Lider Heydər Əliyevin şərəfli ömür yolu, Azərbaycanın tarixindəki müstəsna rolu haqqında məlumat verib. O, Ulu Öndərin həm keçmiş SSRİ dövründə, həm də müstəqillik illərində Azərbaycana rəhbərlik etdiyi illərdə əldə olunan uğurlardan danışıb. Heydər Əliyevin keçmiş SSRİ-nin rəhbərlərindən biri olduğunu diqqətə çatdıran səfir Ulu Öndəri dünyaşöhrətli siyasi xadim, böyük nüfuza malik olan dövlət xadimi kimi xarakterizə edib. Bildirib ki, Ulu Öndər Heydər Əliyevin müstəqil Azərbaycan dövlətinin və dövlətçiliyinin, həmçinin Qırğızıstan-Azərbaycan münasibətlərinin möhkəmləndirilməsi istiqamətində müstəsna xidmətlərinin olduğunu vurğulayıb.

K.Osmonaliyev böyük dövlət xadimi Heydər Əliyevin qırğız xalqına da xüsusi diqqət və məhəbbət ilə yanaşdığını deyib.

Hazırda Qırğızıstanda təxminən 20 mindən çox azərbaycanlı yaşadığını qeyd edən səfir vurğulayıb ki, iki ölkə arasında fundamental diplomatik əlaqələrin əsası 1993-cü ildən qoyulub. Heydər Əliyev 1995-ci ilin avqustunda Türkdilli Dövlət Başçılarının üçüncü sammitində iştirak etmək üçün Qırğızıstana gedib və orada qırğızıstanlı həmkarı ilə görüşüb. 1996-cı il sentyabrın 11-də iki ölkənin Xarici İşlər nazirlikləri arasında protokol imzalanıb.

O vurğulayıb ki, bu gün Qırğızıstan və Azərbaycan bütün beynəlxalq təşkilatlarda əməkdaşlıq edir və həmişə bir-birini dəstəkləyir.

“Dövlət başçılarının görüşündə müzakirə olunan məsələlər və imzalanan sənədlər münasibətlərin sonrakı mərhələdə yüksələn xətlə inkişafına təkan vermiş oldu. İki ölkə prezidentlərinin mətbuata bəyənatları, səfər çərçivəsində imzalanmış sənədlər, xüsusən də Strateji Tərəfdaşlıq haqqında Bəyannamə göstərir ki, Azərbaycan-Qırğızıstan münasibətləri keyfiyyətcə yeni səviyyəyə çatıb, onların arasında qardaşlıq və dostluq əlaqələri bundan sonra daha möhkəmlənəcək” – deyən diplomat qeyd edib ki, Azərbaycanda Ulu Öndər Heydər Əliyev haqqında çoxlu kitablar yazılıb və yazılır. Heydər Əliyevə həsr olunmuş möhtəşəm, maraqlı, dəyərli əsərlər uzun illər bundan sonra da yaradılacaq. Ümummilli Liderin fəaliyyətini əks etdirən bu kitab cəmiyyətdə böyük maraq doğurur. Nəşrdə təqdim olunan faktlar Ulu Öndərin çoxşaxəli fəaliyyətində mühüm məqamları əks etdirir.

Səfir, eyni zamanda deyib ki, müasir Azərbaycanın memarı olan Heydər Əliyev dövlət institutlarını təkmilləşdirdi, çox ehtiyac duyulan xarici əlaqələri genişləndirdi, hərtərəfli enerji strategiyasını reallaşdırdı və beləliklə, ölkənin uzunmüddətli inkişafının təməli qoyuldu. Ulu Öndər Heydər Əliyevin Azərbaycan dövlətçiliyinin möhkəmləndirilməsinə yönəlmiş strategiyası hazırda uğurla davam etdirilir.

Azərbaycan Qırğızıstandakı səfiri Lətif Qəndilov çıxışında Ümummilli Liderin XX əsrdə Azərbaycanın inkişafı yolunda ən böyük xidmətlər göstərmiş dahi şəxsiyyət olduğunu qeyd edib. Vurğulayıb ki, dahi şəxsiyyətin ömür yolu Vətənə, doğma xalqa və millətə sonsuz sədaqət və məhəbbətin parlaq rəmzidir. Azərbaycanın iftixarı, qüdrətli dövlət xadimi və yenilməz siyasi xadim Heydər Əliyev özünün möhtəşəm fəaliyyəti ilə dünya azərbaycanlılarının Ümummilli Lideri səviyyəsinə yüksəlmiş, xalqımızın yaddaşında və qəlbində şöhrəti və nüfuzu sərhəd tanımayan polad iradəli rəhbər olaraq qalmışdır.

Təqdimat mərasimində çıxış edən “Heydər Əliyevin həyatının 100 anı” kitabının müəllifi Emil Nəsirli “Ulu Öndər Heydər Əliyevin irsinə həsr olunmuş kitabların nəşri” beynəlxalq layihəsi çərçivəsində Azərbaycan, ingilis, rus, rumın və digər dillərində işıq üzü görmüş nəşr haqqında geniş məlumat verib. Deyib ki, dünyaşöhrətli siyasi xadim Heydər Əliyevin müstəqil Azərbaycanda yenidən hakimiyyətə qayıtması, onu böhrandan xilas etməsi, ölkə həqiqətlərinin dünyaya çatdırılması, Qarabağ münaqişəsində atəşkəsin elan olunması istiqamətlərində xidmətləri və digər məsələlər kitabda sənədli təsvirlərin dili ilə şərh edilir.

O bildirib ki, Heydər Əliyev haqqında yazdığı bu kitab, eyni zamanda, Azərbaycan tarixini özündə əks etdirir. Heydər Əliyev 1993-cü ildə xalqın təkidli tələbi ilə yenidən hakimiyyətə qayıtdıqdan sonra Azərbaycan yeni bir eraya qədəm qoyub. Ulu Öndərin müasir və müstəqil Azərbaycana rəhbərliyinin əsas nəticəsi ondan ibarətdir ki, dağılmaq ərəfəsində olan respublikamız dinamik inkişaf edən bir ölkəyə çevrilib. Bu, heç də asan başa gəlməyib. Azərbaycanı inkişaf yoluna yönəltmək üçün böyük əmək sərf olunub. Hələ ötən əsrin 70-ci illərində respublikaya rəhbərlik edən Heydər Əliyev zavod və fabriklərin açılışında iştirak edib, minlərlə məktəbin, xəstəxananın, mədəniyyət müəssisəsinin təməlini qoyub. Bütün bunlar kitabda fotoşəkillərlə öz əksini tapıb.

Müəllif onu da vurğulayıb: “Bu güclü şəxsiyyətin həyat yolu və mübarizəsi kitablar vasitəsilə gənc nəslə ona görə çatdırılmalıdır ki, onlar fərd kimi deyil, şəxsiyyət kimi formalaşsınlar. Odur ki, Ulu Öndərin həm SSRİ dövründə, həm də müstəqillik illərində Azərbaycanda gördüyü işlər təkcə yazılarla yox, həmçinin fotolardan ibarət kitablar vasitəsilə yetişməkdə olan gənclərə çatdırılmalıdır. Nəşrdə yeni dövrü əks etdirən fotolar arasında Bakı-Tbilisi-Ceyhan əsas ixrac boru kəmərinin təməlqoyma mərasimini və buna bənzər digər anları yaşadan fotoşəkillər xüsusi yer tutur. Bütün bunlar yeni tariximizin öyrənilməsində və təbliğində əhəmiyyətli rola malikdir.

Heydər Əliyevin siyasi kursunun uğurla davam etdirilməsi sayəsində Azərbaycanın dünya miqyasında nüfuzu yüksəlib. Bu yüksəliş siyasi strategiyanın möhkəm əsasları üzərində bərqərar olub. Azərbaycanda 1990-cı illərin əvvəllərində ictimai-siyasi sabitlik yaratmaq, dünyanın diqqətini ölkəmizə yönəltmək, iqtisadi islahatlara geniş meydan vermək, əhalinin sosial vəziyyətini yaxşılaşdırmaq sadəcə olaraq cari tədbirlərin nəticəsi deyil. Heydər Əliyev, ilk növbədə, Azərbaycanın dünyadakı yerini və qlobal siyasətdəki rolunu müəyyənləşdirib, bölgədə marağı olan dövlətlərlə qarşılıqlı faydalı əməkdaşlıq qura bilib. Dünyanın siyasi xəritəsinə nəzər yetirsək, Azərbaycanın ərazicə kiçik ölkə olduğunu görərik. Lakin ölkəmiz bu gün Avropanın enerji təhlükəsizliyində mühüm rol oynayır.

Emil Nəsirli bildirib ki, Azərbaycanla Qırğızıstan arasında yaranan uğurlu dövlətçilik münasibətlərinin əsası Ulu Öndər Heydər Əliyev tərəfindən qoyulub. Ümummilli Lider 1995-ci ilin avqustunda Türkdilli Dövlət Başçılarının III Zirvə görüşü və “Manas” eposunun 1000 illiyinə həsr olunmuş tədbirlərdə iştirak etmək üçün ilk dəfə Qırğızıstana səfərindən sonra ildən-ilə inkişaf edən münasibətlər hazırda iki ölkə arasında strateji tərəfdaşlıq səviyyəsinə yüksəlib.

Qırğızıstan Prezidenti Sadır Japarov ölkəmizdə rəsmi səfərdə olub. Səfər zamanı ölkələrimiz arasında Strateji Tərəfdaşlıq haqqında Bəyannamə imzalanıb.

Tədbirdə Qırğızıstan parlamentinin deputatı, Qırğızıstan-Azərbaycan parlament dostluq qrupunun rəhbəri İskəndər Matraimov, Qırğızıstan Xalqları Assambleyası Şurasının sədri Almanbet Matubraimov, Qırğızıstan parlamentinin sabiq spikeri Medekan Şerimkulov, “Qırğızıstan-Azərbaycan” Dostluq və Əməkdaşlıq Birliyinin sədri, Qırğızıstanın Əməkdar həkimi Akif Alaferdov, Qırğız Respublikasının keçmiş xarici işlər naziri, Ç.Aytmatov adına “Beynəlxalq İssık-Kul Forumu” İctimai Birliyinin prezidenti, “Azərbaycanın Dostları Klubu”nun təsisçisi Əsgər Aytmatov, kinorejissor, Qırğızıstanın Əməkdar mədəniyyət xadimi Zamir Erəliyev, Qırğızıstandakı “Mərkəzi Asiyada Mütərəqqi Azərbaycanlılar Birliyi” İctimai Birliyinin sədri Xansuvar Baxşəliyev çıxış edərək, Ulu Öndərin əziz xatirəsinin hər iki ölkədə dərin hörmətlə anıldığını, Azərbaycan və qırğız xalqlarının tarixinin, dilinin, dininin və mədəni dəyərlər baxımından bir-birinə çox sıx tellərlə bağlılığının olduğunu, bu iki xalq arasında münasibətlərin tarixinin dərinliklərinə gedib çıxdığını, müstəqilliyin ilk illərində Azərbaycan-Qırğızıstan əlaqələrinin Mərkəzi Asiyanın digər Türk dövlətləri ilə olduğu kimi, əsasən beynəlxalq və regional təşkilatların işində əməkdaşlıq çərçivəsində həyata keçirildiyini, ikitərəfli münasibətlərin genişlənməsində isə Ümummilli Liderin əvəzsiz xidmətlərinin olduğunu diqqətə çatdırıblar. Xüsusi qeyd olunub ki, Azərbaycan digər Türk dövlətləri ilə olduğu kimi, Qırğızıstanla da geniş siyasi-iqtisadi və mədəni əlaqələrini etibarlı şəkildə davam etdirir. Hər iki ölkənin məqsədi Türk dünyasının inkişafına, siyasi və mədəni birliyinə töhfə verməkdir. İmzalanan sənədlər və liderlərin səsləndirdikləri fikirlər iki qardaş ölkənin münasibətlərində hərtərəfli əməkdaşlığa hesablanan yeni mərhələnin əsasının qoyulduğunu deməyə əsas verir. Bütün bunlar türkdilli dövlətlər arasında qardaşlıq münasibətlərinin inkişafında nümunəyə çevrilir.

Mərasimdə Heydər Əliyevin xarici siyasətində xüsusi yer tutan Azərbaycanın dünyanın bütün güc mərkəzləri, qonşu və qeyri-qonşu dövlətlər, o cümlədən Qırğızıstan ilə yeni, qarşılıqlı faydalılığa əsaslanan münasibətlərin formalaşdırılması, inkişaf etdirilməsi, Cənubi Qafqazda maraqları və təsir imkanları olan böyük ölkələr, eyni zamanda, region dövlətləri ilə münasibətləri barədə geniş fikir mübadiləsi aparılıb.

Sonra Qırğızıstandakı “Mərkəzi Asiyada Mütərəqqi Azərbaycanlılar Birliyi” İctimai Birliyinin sədri Xansuvar Baxşəliyev tərəfindən Emil Nəsirliyə qırğız milli hədiyyələri təqdim olunub.

Sonda Emil Nəsirli “Heydər Əliyevin həyatının 100 anı” kitabını tədbir iştirakçılarına hədiyyə edib.