BMT BAŞ KATİBİ BEYNƏLXALQ YOXSULLUQLA MÜBARİZƏ GÜNÜ MÜNASİBƏTİLƏ MÜRACİƏT ETMİŞDİR
Yoxsulluğun ailələri, icmaları və xalqları məhv etdiyini, qeyri-sabitlik və siyasi iğtişaşların yaranmasına, münaqişələrin baş verməsinə səbəb olduğunu qeyd edən baş katib, hazırda dünyada 800 milyonadək insanın xroniki aclıq və azqidalanmadan əziyyət çəkdiyini bildirir: “Bilavasitə yoxsulluqla bağlı səbəblərdən hər gün dünyada 30 min uşaq dünyasını dəyişir”.
Beynəlxalq Yoxsulluqla Mübarizə gününün builki mövzusunun “Minilliyin İnkişaf Məqsədlərinə nail olunması: əhalinin ən yoxsul təbəqələrinin səlahiyyətlərinin genişləndirilməsi” olduğunu bildirən K.Annan vurğulayır ki, inkişaf prosesindən kənarda qalan insanlar da daxil olmaqla, əhalinin ən yoxsul təbəqəsi ilə birbaşa təmasda olmadan yoxsulluğun səviyyəsini aşağı salmaq mümkün deyildir.
Baş katib inanır ki, Minilliyin İnkişaf Məqsədləri və cari ilin sentyabrında 189 dövlətin qəbul etdiyi Minillik Bəyannaməsindəki öhdəliklərin yerinə yetirilməsi yoxsulluqla mübarizədə dönüş yaradacaqdır. O, insanları daha yaxşı həyat şəraiti ilə təmin etmək üçün zəngin və yoxsul ölkələrin əməkdaşlığının yoxsulluqla mübarizədə səmərəli olacağına inanır.
