BMT-NİN BAŞ KATİBİ İRANA SƏFƏRİNİ TƏXİRƏ SALMIŞDIR

05.11.2005 [18:54]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, BMT-nin baş katibi Kofi Annan güclü beynəlxalq təzyiq qarşısında geri çəkilərək, yaxın vaxtlarda İrana nəzərdə tutulan səfərini təxirə salmışdır. Onun rəsmi nümayəndəsinin bildirdiyinə görə, K.Annan və İran hökuməti belə bir ortaq məxrəcə gəlmişlər ki, İran Prezidenti Mahmud Əhmədinejadın bu yaxınlarda İsrail əleyhinə söylədiyi fikirlərin doğurduğu arasıkəsilməz mübahisələr üzündən indiki məqam baş katibin səfəri üçün münasib deyildir.

Xatırladaq ki, İran Prezidenti oktyabrın 26-da İsraili bir dövlət kimi Yer üzündən silməyi təklif etmişdi. Bu bəyanat bütün dünyada etiraz dalğası doğurmuşdur. İsrail hökuməti BMT Təhlükəsizlik Şurasından (TŞ) bu nifrət dolu bəyanata qətiyyətli və sərt münasibət göstərməyi tələb etmişdir. TŞ oktyabrın 28-də təcili məsləhətləşmələr keçirmiş və İran Prezidentinin İsrail əleyhinə mövqeyini pisləyən bəyanat qəbul etmişdir.

BMT baş katibinin xarici səfərinin artıq dəyişdirilmiş marşrutuna Misir, Səudiyyə Ərəbistanı, Tunis və Pakistan daxildir. K.Annan noyabrın 7-də yolüstü Parisdə Fransa Prezidenti Jak Şirakla da görüşəcəkdir.

BMT-NİN BAŞ KATİBİ İRANA SƏFƏRİNİ TƏXİRƏ SALMIŞDIR

MÜƏLLİFLƏ ƏLAQƏ

Bölmənin digər xəbərləri