BMT-NİN BİNASI QARŞISINDA PİKET KEÇİRİLMİŞDİR
Nyu-York, 28 fevral (AZƏRTAC). Erməni millətçi separatçılarının Dağlıq Qarabağın Xocalı şəhərinin dinc sakinlərinə tutduqları amansız divanın növbəti ildönümü ilə əlaqədar fevralın 27-də Birləşmiş Millətlər Təşkilatının binası qarşısında etiraz piketi keçirilmişdir.
Aksiyanın iştirakçısı, Azərbaycanın əməkdar rəssamı İsmayıl Məmmədov AZƏRTAC-ın müxbirinə demişdir: “Məşhur 4-cü strit və 1-ci avenyu küçələrinin kəsişdiyi yerə gələnlər arasında təkcə həmvətənlərimizi deyil, həm də Nyu-Yorkun digər milli icmalarının nümayəndələrini gördüm. Onların bir çoxu dərdimizə şərik olan, Azərbaycan xalqı ilə həmrəylik nümayiş etdirən amerikalı dostları ilə gəlmişdilər. Piket iştirakçıları əllərində 1992-ci ilin fevralında törədilmiş amansız qətliamın təşkilatçılarının və icraçılarının cəzalandırılması tələb edən transparantlar tutmuşdular. Yoldan keçənlərə illüstrasiyalı vərəqələr paylanırdı. Ətrafa səsucaldanlar vasitəsilə səsləndirilən “Ermənistana ar olsun!”, “Qarabağa ədalət!”, “Ermənistan Qarabağdan rədd ol" və başqa şüarlar yayılırdı. Əminəm ki, Nyu-Yorkun mərkəzində keçirilən iki saata yaxın piket müsbət rol oynadı. Bir çox insanlar bizə yaxınlaşıb vəziyyətlə maraqlanır, başsağlığı verirdilər. Bir sözlə, faciəmiz haqqında həqiqəti elə özümüzdən öyrənirdilər”.
Tomris Azəri başda olmaqla, Amerika Azərbaycanlıları Cəmiyyətinin təşkil etdiyi etiraz aksiyasında Milli Məclisin deputatları Qənirə Paşayeva, Həvva Məmmədova, ABŞ-dakı dağ yəhudiləri diasporunun mədəniyyət mərkəzinin prezidenti Yakov Abramov, diplomatik nümayəndəliklərimizin əməkdaşları, buradakı ali məktəblərdə təhsil alan azərbaycanlı tələbələr iştirak edirdilər.
Sonda tədbir iştirakçıları qətnamə qəbul etmişlər. Sənəd BMT-nin baş katibinə təqdim ediləcəkdir.
Bölmənin digər xəbərləri
