BMT süni intellektin inkişafı ilə bağlı gənclər sammiti keçirib
Bakı, 13 avqust, AZƏRTAC
Süni intellekt (AI) öyrənmə tərzimizdən tutmuş əmək bazarına qədər hər şeyi sürətlə dəyişdirir, uşaq və yeniyetmələr bu texnologiyanı böyüklərdən üç dəfədən çox daha tez mənimsəyirlər və bu, onları unikal imkanlar və risklərlə qarşı-qarşıya qoyur.
AZƏRTAC xəbər verir ki, BMT çərşənbə günü Nyu-Yorkdakı qərargahında dünyanın hər yerindən 600-dən çox gəncin iştirakı ilə keçirdiyi sammitdə süni intellekt texnologiyalarının Dayanıqlı İnkişaf Məqsədlərinə (DİM) dəstək verməsi və bu sahədə gənclərin liderliyi məsələlərini müzakirə edib.
Tədbir gənclərin bugünkü qlobal cəmiyyətdə tərəfdaş kimi potensialını qeyd etmək məqsədilə 2000-ci ildən bəri hər il avqustun 12-də qeyd olunan Beynəlxalq Gənclər Günündə baş tutub.
Beynəlxalq Gənclər Təşkilatı tərəfindən təşkil edilən müxtəlif müzakirələrdən və seminarlardan sonra nümayəndələr AI siyasəti və idarəetməsi haqqında gənclər Bəyannaməsini təqdim ediblər. Bu sənəd qlobal AI idarəçiliyini, xüsusən də Qlobal Rəqəmsal Saziş fonunda gənclərin səylərini əhatə edir.
Sammit gənclərin səslərini süni intellektlə bağlı qərar qəbuletmə proseslərinə inteqrasiya etmək üçün BMT-nin əvvəlki səylərinə, o cümlədən AI idarəetməsi üzrə Qlobal Dialoqa, Beynəlxalq Telekommunikasiya İttifaqı (BTİ) Baş katibinin Gənclər Məsləhət Şurasına və Elm, Texnologiya və İnnovasiya Forumuna əsaslanır.
BMT Baş katibinin gənclərlə iş üzrə köməkçisi Felipe Paullier sammitdə qeyd edib: “Gənclər AI texnologiyalarının hərəkətverici qüvvəsidir və onlar idarəetmədə, tənzimləyici qaydaların hazırlanmasında daha fəal iştirak etməlidirlər”.
Təşkilatın Baş katibi Antonio Quterreş çərşənbə günü verdiyi açıqlamada gənclərin iqtisadi qeyri-müəyyənlik, rəqəmsal inteqrasiya və iqlim dəyişikliyi də daxil olmaqla çoxsaylı çətinliklərlə üzləşdiyini qəbul edib və qərar qəbuletmə proseslərində BMT-nin onlarla birlikdə olduğunu vurğulayıb.
Natiqlər bildiriblər ki, gənc nəsil süni intellektdən istifadənin bəşəriyyətə güc verməsini və insanların sadəcə iş tapmaq əvəzinə yeni bacarıqlar öyrənməsini təmin etmək üçün səyləri artırmalıdır. Daha ədalətli cəmiyyətlər, güclü icmalar və dayanıqlı dünya qurmaq üçün AI texnologiyaları sahəsində gənclərin liderliyinə ehtiyac duyulur.
Bölmənin digər xəbərləri
