Bolqarıstanda Ümummilli Liderin 103-cü illiyi qeyd edilib
Bakı, 8 may, AZƏRTAC
Mayın 7-də Azərbaycanın Bolqarıstandakı səfirliyində Ümummilli Lider Heydər Əliyevin anadan olmasının 103-cü ildönümünə həsr olunmuş anım tədbiri keçirilib.
Bu barədə AZƏRTAC-a səfirlikdən məlumat verilib.
Bildirilib ki, səfir Elmar Məmmədov tədbirdə çıxış edərək Ümummilli Lider Heydər Əliyevin dövlətçiliyin möhkəmləndirilməsi, müstəqilliyin qorunması və Azərbaycanın beynəlxalq mövqeyinin gücləndirilməsindəki xidmətlərindən danışıb. Diqqətə çatdırıb ki, Heydər Əliyev mürəkkəb bir dövrdə ölkəni böhrandan çıxararaq sabitlik və inkişaf yoluna yönəldib. Diplomat Prezident İlham Əliyevin rəhbərliyi ilə bu strateji kursun uğurla davam etdirildiyini qeyd edib.
Tədbirdə Heydər Əliyevin Azərbaycan-Bolqarıstan münasibətlərinin inkişafındakı rolu xüsusi qeyd olunub. Vurğulanıb ki, onun 1995-ci ildə Bolqarıstana səfəri zamanı imzalanmış Dostluq və Əməkdaşlıq Müqaviləsi iki ölkə arasında tərəfdaşlığın əsasını qoyub.
Bolqarıstanın Azərbaycandakı ilk səfiri olmuş İvan Palçev Heydər Əliyevin liderlik keyfiyyətlərindən və regionda sabitliyə töhfələrindən danışıb.
Sofiya Universitetinin professoru, Azərbaycan Dövlət Neft və Sənaye Universitetinin məzunu olmuş Georg Georgiev isə Azərbaycanla bağlı xatirələrini bölüşərək Ulu Öndərin enerji strategiyasındakı rolunu yüksək qiymətləndirib.
Sonra Elmar Məmmədov Heydər Əliyevin Azərbaycanın mədəni irsinə, mədəniyyət paytaxtımız Şuşaya verdiyi önəmi vurğulayıb, bu xüsusda səfirlikdə yenicə yaradılmış, Şuşa şəhərinin adını daşıyan zalda ilk tədbirin məhz Ümummilli Liderin xatirəsinə həsr edilməsinin təsadüfi olmadığını qeyd edib.
Diplomat Prezident İlham Əliyevin rəhbərliyi ilə Şuşanın işğaldan azad edilməsinin tarixi əhəmiyyətini qeyd edib, hazırda Qarabağda və Şərqi Zəngəzurda geniş bərpa işlərinin aparıldığını diqqətə çatdırıb.
Elmar Məmmədov bildirib ki, 2022-ci ildə Şuşa ilə Veliko Tırnovo arasında imzalanmış qardaşlaşma memorandumu çərçivəsində yaradılması planlaşdırılan “Şuşa Parkı” iki ölkə arasında strateji tərəfdaşlıq və mədəni əlaqələrin yeni simvolu olacaq.
Tədbir çərçivəsində pianoçu Ana Linçevanın ifasında Heydər Əliyevin xatirəsinə həsr olunmuş konsert proqramı təqdim edilib, Azərbaycan bəstəkarlarının və xalq musiqisinin nümunələri səsləndirilib.
Sonda iştirakçılara Azərbaycan milli mətbəxinin nümunələri təqdim olunub.
Bölmənin digər xəbərləri
