Böyük Britaniya ilə ABŞ arasında yeni texnologiya tərəfdaşlığı sazişi imzalanıb
London, 18 sentyabr, AZƏRTAC
Böyük Britaniyanın Baş naziri Kir Starmer və ABŞ Prezidenti Donald Tramp Çekersdə birgə mətbuat konfransı keçiriblər.
AZƏRTAC xəbər verir ki, tədbirdə Tramp və Starmer Böyük Britaniya ilə ABŞ arasında yeni texnologiya tərəfdaşlığı sazişini imzalayıblar. Kir Starmer ABŞ-ı Birləşmiş Krallığın ən böyük ticarət tərəfdaşı adlandırıb və bildirib ki, bununla hər iki ölkənin iqtisadiyyatında 2,5 milyondan çox iş yeri dəstəklənir.
O vurğulayıb ki, Böyük Britaniya və ABŞ texnologiya, maliyyə, müdafiə və enerji sahələrində lider mövqedədirlər. Baş nazir may ayında ABŞ-la imzalanmış tariflər barədə razılaşmanı da xatırladıb. Deyib ki, həmin vaxt ən yaxşı nəticə əldə edilib, həyati əhəmiyyət daşıyan sahələrdə dünyanın ən aşağı tariflərinə nail olunub. Onun sözlərinə görə, bu, çətin danışıqlar idi, lakin hər iki tərəf üçün qələbə oldu. Starmer əlavə edib ki, mülki nüvə enerjisi üzrə yeni razılaşma milyonlarla müəssisəyə enerji təmin edəcək.
ABŞ Prezidenti Donald Tramp isə iki ölkə arasında qırılmaz bağları vurğulayıb. O əlavə edib ki, bu il ABŞ-la ticarət sazişi imzalayan ilk ölkə Böyük Britaniya olub. D.Tramp iki ölkənin sənaye imkanlarını artırdığını və bunun müdafiə baxımından da böyük əhəmiyyət daşıdığını diqqətə çatdırıb. Tramp onu da açıqlayıb ki, nüvə reaktorlarının yerləşdirilməsi ilə bağlı razılaşma nəhayət reallaşır. Onun sözlərinə görə, Amerikanın “X-energy” və Britaniyanın “Centrica” şirkətləri Böyük Britaniya ərazisində nüvə reaktorları quraşdırmaq barədə saziş imzalayır və bu məsələ nəhayət reallaşır.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
