Braziliya prezidenti CO₂ emissiyalarının azaldılması məsələsinə ciddi yanaşmağa çağırıb
Bakı, 20 noyabr, AZƏRTAC
Braziliya Prezidenti Luis İnasiu Lula da Silva Belem şəhərində keçirilən BMT-nin iqlim konfransında (COP30) aparılan danışıqların icmalını təqdim edib. Dövlət başçısı qeyd edib ki, dünya liderləri istixana qazlarının emissiyalarının azaldılması öhdəliyini üzərilərinə götürməlidirlər. O, bunun iqlim böhranı ilə mübarizənin əsas şərti olduğunu vurğulayıb.
AZƏRTAC xəbər verir ki, Prezidentin sözlərinə görə, Braziliya tərəfindən təklif olunan “Yol Xəritəsi” qlobal miqyasda fossil yanacaqlardan istifadənin azaldılmasına yönəlmiş konkret plan və hədəfləri əhatə edir. “Hər kəs öz məsuliyyətini anlamalıdır. Cəmiyyətə göstərməliyik ki, biz nə təzyiq göstərir, nə də sərt son tarixlər qoyuruq, amma bu məsələyə ciddi yanaşırıq. Hər bir ölkə öz imkan və müddətlərini özü müəyyən edir, lakin emissiyaları azaltmaq məcburiyyətindəyik”, - deyə o vurğulayıb.
Prezident COP30-un Belemdə keçirilməsinin xüsusi əhəmiyyət daşıdığını bildirib. Onun sözlərinə görə, əvvəlcə iri beynəlxalq tədbirlərə ev sahibliyi etməmiş bu şəhərin seçilməsi Amazoniyanın real simasını bütün dünyaya göstərmək məqsədi daşıyır: “Biz Amazoniyanı olduğu kimi təqdim etmək və bu obrazı dünyanın yaddaşında möhkəmləndirmək istədik”, - deyə o, regionun qonaqpərvərliyini və unikallığını qeyd edərək söyləyib.
Birinci “xalq COP-u”
Braziliya Prezidenti qeyd edib ki, builki konfrans cəmiyyətin prosesə misilsiz dərəcədə cəlb olunması ilə fərqlənir: “Bunu ilk həqiqi xalq COP-u adlandırmaq olar, dünyanın hər yerindən insanlar buraya axışıb ki, öz fikirlərini ifadə etsinlər”.
COP30-un prezidenti Andre Korrea du Laqu bildirib ki, ötən gün danışıqlarla zəngin keçib və xüsusilə çətin mövzular olan adaptasiya, maliyyələşmə və “Yol Xəritəsi” üzrə intensiv müzakirələr aparılıb. O, həmçinin özəl sektorun, vətəndaş cəmiyyətinin və yerli icra hakimiyyətlərinin fəal iştirakını vurğulayıb.
Almaniyanın Tropik Meşələrin Mühafizəsi Fonduna böyük töhfəsi
Braziliyanın ətraf mühit və iqlim dəyişikliyi naziri Marina Silva Tropik Meşələrin Mühafizəsi Fondu (TFFF) ilə bağlı mühüm irəliləyişlər barədə məlumat verib: “Almaniya təqribən 1 milyard avro məbləğində vəsait ayıracağını açıqlayıb. Bu, uzunmüddətli səylərin nəticəsi və yeni beynəlxalq maliyyələşmə mexanizminə etimadın göstəricisidir.”
Fond iqlim maliyyələşməsinin yeni modelini təklif edir. Belə ki, tropik meşələri qoruyan ölkələr qlobal investisiya mexanizmi vasitəsilə maliyyə kompensasiyası alır, investorlar isə yatırdıqları vəsaitlərini bazar gəlirliliyi ilə geri qazanırlar. Beləliklə, qorunan meşələr sosial-iqtisadi inkişaf mənbəyinə çevrilir.
COP30-da yerli xalqların iştirakı
Prezidentin mühüm çağırışlarından biri də ekoloji fəaliyyətlərə cəmiyyətin bütün təbəqələrinin geniş cəlb olunması ilə bağlıdır. O, qadınların, gənclərin və yerli xalqların iştirakının xüsusi əhəmiyyət daşıdığını vurğulayıb: “COP tarixində ilk dəfə Belemdə 3 500 yerli xalq nümayəndəsi iştirak edir. Qadınlar da bərabərhüquqlu təmsil olunmalıdır”.
Lula, həmçinin inkişaf etməkdə olan ölkələrə dəstək göstərilməsinin zəruriliyini xatırladıb: “İqlimə qayğı — planetin gələcəyinə qayğıdır. Zəngin ölkələr kasıb ölkələrə meşələri və təmiz suyu qorumaqda kömək etməlidir”.
Prezident qeyd edib ki, Braziliya neft hasil edən ölkə olsa da, biotərkibli yanacaq, etanol və bərpaolunan enerji mənbələrindən istifadə üzrə dünya liderlərindəndir: “Elektrik enerjimizin 87 faizi təmizdir. İstəyirəm ki, digər ölkələr də bu səviyyəyə çatsın”.
Lula varlı dövlətləri yalnız maliyyə baxımından deyil, həm də texnologiyaların ötürülməsi yolu ilə Afrikanın enerji keçidinin, bioyanacaq, külək və Günəş enerji sektorlarının inkişafının dəstəklənməsinə çağırıb.
Prezident danışıqlar qrupunun uğurlu nəticələr əldə edəcəyinə əminliyini ifadə edib: “COP-da heç nə məcburi deyil, bütün qərarlar konsensusla qəbul olunur. Biz hər bir ölkənin suverenliyinə hörmət edirik. Biz sadəcə deyirik: bu mümkündür və gəlin, bunu birlikdə qurub reallaşdıraq”.
Bölmənin digər xəbərləri
