Britaniyada enerji qiymətləri Yeni ildə gözlənilmədən artacaq
London, 21 noyabr, AZƏRTAC
Britaniyada milyonlarla ev təsərrüfatı gələn ilin əvvəlində enerji qiymətlərində cüzi artımla üzləşəcək.
AZƏRTAC xəbər verir ki, enerji tənzimləyicisi “Ofgem” yanvarın əvvəlindən qüvvəyə minəcək növbəti qiymət həddini açıqlayıb. Yeni qərara əsasən, İngiltərə, Uels və Şotlandiyada dəyişkən tariflərlə enerji istifadə edən abonentlər üçün qiymət həddi 0,2 faiz artırılacaq. Bu artım proqnozlaşdırılmamışdı, çünki daha əvvəl analitiklər ilin əvvəlində qiymət həddinin enəcəyini gözləyirdilər. “Ofgem” bildirir ki, artıma əsas səbəb hökumət siyasətindəki dəyişikliklərdir.
Qaz və elektrik qiymətləri hələ də nisbətən yüksək olaraq qalır, ölkədə temperaturun kəskin enməsi isə enerji xərclərini yenidən gündəmə gətirib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
