Brüsseldə Xocalı soyqırımı ilə bağlı tədbir keçirilmişdir
Paris, 2 mart (AZƏRTAC). Azərbaycanın Belçika Krallığındakı səfirliyinin mətbuat xidmətindən AZƏRTAC-a bildirmişlər ki, martın
1-də Avropa-Azərbaycan Cəmiyyəti və respublikamızın bu ölkədəki səfirliyi tərəfindən Xocalı soyqırımının 19-cu ildönümünə həsr edilmiş tədbir keçirilmişdir.
Tədbiri açan Azərbaycanın Belçika krallığındakı və Lüksemburq hersoqluğundakı səfiri Emin Eyyubov iştirakçıları Xocalı soyqırımı qurbanlarının xatirəsini bir dəqiqəlik sükutla yad etməyə dəvət etmişdir. Sonra səfir 19 il öncə erməni terrorçularının Xocalıda törətdikləri soyqırımı haqqında məlumat vermiş və bu soyqırımın dünyada tanınması, haqqın və ədalətin öz yerini tapması üçün ölkəmizin birinci xanımı, YUNESKO və İSESKO-nun xoşməramlı səfiri Mehriban Əliyevanın rəhbərlik etdiyi Heydər Əliyev Fondunun vitse-prezidenti Leyla Əliyevanın təşəbbüsü ilə elan olunmuş “Xocalıya Ədalət!” Beynəlxalq kampaniyasının oynadığı mühüm roldan və kampaniyanın ildən-ilə daha geniş vüsət almasından danışmışdır. E.Eyyubov yalnız səfirliyin deyil, Belçikadakı Azərbaycan diaspor təşkilatlarının da bu aksiyaya qoşulduğunu və müvafiq tədbirlərin görüldüyünü diqqətə çatdırmışdır.
Avropa-Azərbaycan Cəmiyyətinin nümayəndəsi Leon Kuk çıxışında Xocalı soyqırımının baş verdiyi günləri xatırlatmış, 613 mülki insanın qəddarlıqla qətlə yetirildiyini, bu soyqırımı törədənlərin hələ də cəzasız qaldığını, BMT, ATƏT və digər nüfuzlu təşkilatların qərar və qətnamələrinə baxmayaraq, Azərbaycan torpaqlarının 20 faizinin hələ də Ermənistanın işğalı altında olduğunu qeyd etmiş və beynəlxlaq birliyi Xocalı soyqırımını tanımağa çağırmışdır.
İsveç parlamentinin sabiq üzvü, Avropa Şurası Parlament Assambleyası sədrinin müavini və qurumun siyasi məsələlər komitəsinin sədri vəzifələrini tutmuş Goran Linblad “Justice for Khojaly” internet səhifəsinin yeniləşmiş versiyasını iştirakçılara təqdim etmiş, “Xocalıya Ədalət!” kampaniyası barədə geniş məlumat vermiş və hamını dünya liderlərinə ünvanlanmış petisiyaya qoşulmağa dəvət etmişdir.
Tədbir zamanı iştirakçılar “Justice for Khojaly” klipinə tamaşa etmiş və həzin musiqinin müşayiəti ilə soyqırımı qurbanlarının ad və soyadlarını ekranda seyr etmişlər. Sonra iştirakçılar Heydər Əliyev Fondu və “Xocalıya Ədalət!” beynəlxalq kampaniyası tərəfindən hazırlanmış fotosərgiyə tamaşa etmiş, müvafiq təbliğat materialları ilə tanış olmuş, kampaniyanın hazırladığı və dünya liderlərinə ünvanlanmış petisiyaya imza atmışlar.
Tədbirdə Avropa Parlamentinin üzvləri, xarici ölkələrin səfirliklərinin əməkdaşları, Belçika ictimaiyyətinin nümayəndələri, qeyri-hökumət təşkilatlarının təmsilçiləri, diasporumuzun üzvləri və tələbələriniz iştirak etmişlər.
Azərbaycan-Belçika Dostluq Cəmiyyəti isə səfirliyin dəstəyi ilə ingilis, fransız və Niderland dillərində hazırladığı “Biganə qalmayın” adlı açıqcaları Avropa Parlamentinin, Belçika Senatının və Nümayəndələr Palatasının üzvlərinə poçt və elektron məktub vasitəsilə göndərmişdir. Açıqcalarda Xocalı soyqırımına aid fotolor, soyqırımı haqqında məlumat və “ Xocalıya Ədalət!” kampaniyası çərçivəsində dünya liderlərinə ünvanlanmış petisiyaya qoşulmaq çağırışı öz əksini tapmışdır.
Əsgər Əliyev
AZƏRTAC-ın xüsusi müxbiri
Paris
######
 |
 |
Bölmənin digər xəbərləri
