BU ACI VƏ QANLI TARİX HEÇ ZAMAN UNUDULMAYACAQ
Nazir xüsusilə nəzərə çarpdırmışdır ki, erməni millətçiləri tərəfindən iki əsr müddətində xalqımızın başına olmazın müsibətlərin, faciələrin gətirilməsinə baxmayaraq, soyqırımı barədə həqiqətlər, tarixi faktlar uzun müddət ictimaiyyətdən gizlədilmiş, bu hadisələrə əsl siyasi, hüquqi qiymət yalnız ümummilli liderimiz, cənab Heydər Əliyev tərəfindən verilmişdir. Onun imzaladığı “1948-1953-cü illərdə Azərbaycanlıların Ermənistan SSRİ-dəki tarixi-etnik torpaqlarından kütləvi surətdə deportasiyası haqqında” və “Azərbaycanlıların sorqırımı haqqında” fərmanlar erməni şovinistlərinin xalqımıza qarşı onilliklər ərzində gerçəkləşdirdiyi soyqırımı siyasətinin mahiyyətini açmış, həmin dəhşətli, faciəvi, antibəşəri olayların qan yaddaşımızda əbədi həkk olunmasına həlledici təsir göstərmişdir.
O vaxtdan soyqırımı qurbanlarının xatirəsi hər il dövlət səviyyəsində qeyd edilir. Böyük öndərin ali hakimiyyətə qayıdışından sonra onun qətiyyətlə apardığı uğurlu daxili və xarici siyasət nəticəsində ölkəmizin iqtisadi, müdafiə qüdrətinin durmadan yüksəldiyini, haqq işimizin dünya birliyi tərəfindən dəstəkləndiyini, işğal olunmuş torpaqlarımızın bütün məqbul vasitələrlə geri alınacağı zərurətini dərk edən erməni şovinistləri indi ənənəvi taktikalarını dəyişərək, əsas diqqəti Azərbaycanı beynəlxalq aləmdə nüfuzdan salmağa yönəltsələr də, onların bütün səyləri son nəticədə puç olacaqdır. Nazir vurğulamışdır ki, ümummilli liderimizin xəttinin layiqli davamçısı olan Prezident İlham Əliyev Ermənistanın ölkəmizə qarşı işğalçılıq və təcavüzkar siyasətini dünyanın ən nüfuzlu təşkilatlarında ifşa etmiş, Azərbaycanın ədalətli mövqeyinin beynəlxalq birlik tərəfindən dəstəklənməsi, Ermənistanın işğalçı və təcavüzkar dövlət kimi tanınması işini bu gün də uğurla davam etdirməkdədir.
Yığıncaq iştirakçıları soyqırımı qurbanlarının xatirəsini bir dəqiqəlik sükutla yad etmişlər.
Daha sonra tarix elmləri doktoru, Bakı Dövlət Universitetinin professoru Xaqani Məmmədov azərbaycanlıların soyqırımı haqqında geniş məruzə etmişdir. O bildirmişdir ki, tarixdə bir sıra xalqlar vaxtilə soyqırımına məruz qalsalar da, ermənilərin son iki əsrdə həmvətənlərimizə qarşı həyata keçirdikləri siyasətin dünyada analoqu yoxdur. Dünya tarixində hələ heç bir xalq digər xalqa, özü də qonşusuna qarşı belə vəhşi, zorakı, insanlığa zidd üsullarla, məqsədli şəkildə kütləvi qırğın siyasəti həyata keçirməyibdir. Həm də bu zaman təkcə yüz minlərlə dinc əhali, əsasən, qadınlar, uşaqlar, qocalar ağlagəlməz vəhşiliklə və üsullarla kütləvi şəkildə qətlə yetirilməyib, eyni zamanda, ölkəmiz ərazi, mədəni, toponimik cəhətdən soyqırımına məruz qalıbdır.
Yığıncağa yekun vuran general-polkovnik Ramil Usubov erməni millətçilərinin xalqımıza qarşı törətdikləri vəhşiliklərin, zorakılıqların heç zaman unudulmayacağını, Ermənistanın təcavüzkar siyasəti barədə həqiqətlərin dünya ictimaiyyətinə çatdırılmasının zəruriliyini bildirmiş, daxili işlər orqanlarının bundan sonra da dövlətçiliyimizin, xalqımızın əmin-amanlığının keşiyində ayıq-sayıq dayanacağını vurğulamışdır.
Bölmənin digər xəbərləri
