MƏDƏNİYYƏT
Bu ilin birinci yarısında beynəlxalq turistlərin sayı 21 milyon nəfər artıb
Bakı, 26 sentyabr, AZƏRTAC
Bu ilin birinci yarısında beynəlxalq turizm, ümumilikdə, 4 faiz artıb.
AZƏRTAC Dünya Turizm Təşkilatının (DTT) saytına istinadla xəbər verir ki, bu rəqəmi Dünya Turizm Barometri (World Tourism Barometer) müəyyən edib. İlin ilk altı ayında dünya ölkələri təxminən 538 milyon beynəlxalq turist qəbul ediblər ki, bu rəqəm ötən ilin müvafiq dövrü ilə müqayisədə 21 milyon nəfər çoxdur.
Xatırladaq ki, ilin əvvəlində DTT-nin proqnozuna görə, cari ilin sonunadək beynəlxalq turizm orta hesabla 3-4 faiz artmalı idi. Bu isə təşkilatın 2010-2020-ci illər üzrə uzunmüddətli proqnozunun (illik 3,8 faiz) üstələnməsi deməkdir.
DTT-nin baş katibi Taleb Rifai təşkilatın Baş Assambleyasının Kolumbiyanın Medellin şəhərində keçirilən 21-ci sessiyasında çıxışında bildirib ki, bu artım dünyada genişlənən dəyişikliklərə baxmayaraq, son beş ildə turizmin müsbət tempini möhkəmləndirməsini, inkişaf və iqtisadi imkanları təmin etdiyini göstərir.